.png)
Gazeta Si – Gjyqtari i GJKKO-së, Erion Bani (i cili vlerësoi masën e sigurisë “arrest në burg ndaj kryebashkiakut Erion Veliaj), deklaroi se Gjykata e Posaçme Anti-Korrupsion aktualisht mbulon mbi 99% të çështjeve, pavarësisht disa problematikave.
“Ndryshe nga të gjitha gjykatat e tjera, s’ka krahasueshmëri sa i përket cilësisë së çështjeve, problematikave, numrit të të pandehurve, volumit. Kjo e vështirëson punën, në kushtet kur s’kemi as ndihmës ligjorë, duhet që gjyqtarët të punojnë jo 5 ditë, por 7 ditë edhe jashtë orarit zyrtar”, – tha Bani gjatë tryezës së drejtësisë të organizuar nga Qendra për Studim dhe Demokraci.
Më tej, ai u ndal tek transparenca, duke theksuar se 100% të vendimeve publikohen në faqen zyrtare. Përjashtim bëjnë vetëm ato që kanë të bëjnë me hetimet paraprake.
“Në vitin 2024 kemi mbi 1 mijë vendime më shumë se vitet e kaluara. GJKKO është njohur me raportin e vitit të shkuar, tashmë edhe me mbështetjen e KLGJ-së, eskpertët e IT-së, tashmë publikon 100% të vendimeve të saj në faqen zyrtare. Duke përjashtuar vendimet e fazës së hetimit paraprake Dua të bëj me dije që tashmë keni çdo raport statistikor çdo 3 muaj, pranë Ministrisë së Drejtësisë. Tek Gjykata.gov.al i keni të gjitha vendimet në formatin PDF”, tha Bani.
Erion Bani, është gjyqtari që ka marrë vendimin e “arrestit me burg” për kryebashkiakun Erion Veliaj. Që prej datës 10 Shkurt 2025, ai është gjendur përballë sulmeve nga Veliaj, njëjtë si prokurori i çështjes Olsi Dado.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
