.png)
Nga Gazeta ‘Si’- Qeveria e Kosovës ka mbajtur sot mbledhje festive me rastin e 17 vjetorit të shpalljes së pavarësisë.
Kryeministri Albin Kurti në fjalën e tij para kabinetit qeverisës tha se Kosova feston me krenari rrugëtimin tonë të gjatë drejt lirisë dhe pavarësisë.
“Kushtetuta jonë vërtetë është e re, por kultura jonë është e një populli të lashtë e autokton e rrënjosur thellë në historinë tonë të lavdishme. Ne sot nderojmë të gjithë ata që sakrifikuan dhe u flijuan për lirinë tonë”, ka thënë Kurti.
Ai ka shtuar se liria për të cilën Kosova ka sakrifikuar kaq shumë kërkon demokraci e demokracia kërkon institucione të forta.
“Institucione të forta që mbrojnë sundimin e ligjit, garantojnë zgjedhje të lira te të ndershme dhe sigurojnë që pushteti u shërben qytetarëve”, tha Kurti.
Kurti theksoi sipas tij se suksesi i Kosovës është dëshmi që ka punuar në përputhje me amanetin e idealin e dëshmorëve të kombit dhe në përputhje me të drejtat e popullit, dëshirat e rinisë dhe ëndrrat e fëmijëve.
“Urime e gëzuar dita e pavarësisë. Rroftë Republika jonë”, tha Kurti.
Ndërkohë, presidentja Vjosa Osmani tha se kjo është një ditë për të shprehur mirënjohje për të gjithë ata që sakrifikuan për lirinë e Kosovës.
“Nuk ka asgjë që mund ta ndalë Kosovën e lirë dhe sovrane. Kjo është një ditë kur u shprehim mirënjohje të përhershme të gjithë atyre që dhanë gjithçka për lirinë tonë – nga arkitekti i pavarësisë, presidenti historik, e deri te komandanti legjendar Adem Jashari dhe çdo qytetar i Kosovës që ka sakrifikuar për këtë ditë historike. Do të ecim përpara, sepse Kosova është dhe do të mbetet një republikë e lirë, e pavarur dhe e përjetshme. Urime!”, u shpreh Osmani.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
