.png)
Gazeta Si- Ajola Xoxa, bashkëshortja e Erion Veliajt, ka ankimuar në Gjykatën e Posaçme kontrollin e BKH-së në një apartament pranë qendrës “Harabel” në kuadër të një hetimi pasuror ndaj saj dhe familjarëve të kryebashkiakut të Tiranës të nisur dhjetorin e shkuar nga SPAK.
Përmes avokatëve të saj, Xoxa, ka depozituar një ankim kundër vendimit të gjykatës, duke e konsideruar atë si në shkelje të ligjit.
Ambienti i kontrolluar nga BKH ndodhej një kat mbi një zyrë ligjore të drejtuar nga Xoxa në një kullë në zonën e ish-bllokut dhe sipas SPAK dyshohet se ishte në përdorim të saj.
Agjentët e Byrosë Kombëtare të Hetimit mësynë në apartamentin 11/4, ku u sekuestruan sende me vlerë për hetimin si dokumenta, por edhe materiale të tjera elektronike.
Hetimi ndaj kryebashkiakut Veliaj po ndiqet nga dy prokuror Altin Dumani dhe Ols Dado e ndërsa më herët SPAK ka njoftuar se subjekti po hetohet për 4 vepra penale, konkretisht “korrupsion pasiv dhe aktiv, pastrim parash dhe fsheje pasurie”.
Në fund të dhjetorit 2024, kryebashkiaku Erion Veliaj u pyet për mbi 5 orë nga hetuesit e posaçëm, 3 ditë pasi në godinën e SPAK ishte pyetur edhe bashkëshortja e tij, Ajola Xoxa.
Në një deklaratë të bërë në mbledhjen e Këshillit Bashkiak, ai tha se ishte denoncuar nga një njeri që nuk ekzistonte dhe se i është përgjigjur drejtësisë edhe pse ishte vënë në lëvizje nga denoncime anonime.
Në 6 dhjetor, pas një vendimi të marrë në gjykatë, SPAK vuri në lëvizje Byronë Kombëtare të Hetimit që kreu kontroll personal të Ajola Xoxës, ku i sekuestroi telefonin.
Kontrolle u ushtruan në ambientet e një qendre që drejtohet nga bashkëshortja e Veliajt dhe banesa e ambiente në pronësi të vëllait të tij, Arbër Veliaj.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
