Gazeta Si – Një sherr mes dy vëllezërve binjakë në Fushë Mëzez të Tiranës, i cili dyshohet se ka nisur për lëndët narkotike, precipitoi në përdorimin e armës së zjarrit, ku mbeti i plagosur aksidentalisht nipi i tyre 15-vjeçar, djali i vëllait të tyre të tretë.
Sipas policisë, adoleshenti u plagos nga arma e xhaxhait të tij, Nazmi Pëllumbi 29 vjeç, i cili është shpallur në kërkim, ndërsa në pranga është vënë vëllai tjetër binjak, Florant Pëllumbi.
I mituri u dërgua në gjendje të rëndë në spital dhe vijon të jetë në kujdesin e mjekëve.
Tani ai akuzohet se gjatë konfliktit për motive të dobëta me vëllanë binjak, ka qëlluar me zjarri drejt tij dhe nga të shtënat është dëmtuar aksidentalisht 15-vjeçari (nipi i tyre), djali i vëllait të tretë.
Në aksionin policor të zhvilluar menjëherë pas ngjarjes, u arrestua binjaku i 29-vjeçarit, Florant Pëllumbi, pasi iu gjet në banesë një sasi lënde e dyshuar narkotike kokainë.
Grupi hetimor, ka mundur të zbardhë plagosjen e 15-vjeçarit edhe falë dëshmisë së dhënë nga nëna e këtij të fundit, e cila ka treguar se njëri prej vëllezërve ka qëlluar në drejtim të tjetrit dhe plumbat kanë kapur djalin e saj.
Sipas gruas, konflikti mes të dyve ka nisur fillimisht për shitjen e lëndëve narkotike kokainë, debat që ka degraduar deri në nxjerrje arme. Dyshohet se binjakët janë përfshirë në shitjen e kokainës.
Nazmi Pëllumbi, 29 vjeç, akuzohet për veprat penale “Vrasja me dashje”, mbetur në tentativë”, “Plagosja e rëndë nga pakujdesia” dhe “Mbajtja pa leje dhe prodhimi i armëve, armëve shpërthyese dhe i municionit”. Ndërsa Florant Pëllumbi është nën akuzë për veprën penale “Prodhimi dhe shitja e narkotikëve”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
