Nga Gazeta Si- Prej dy ditësh një 15 vjeçar nga Postriba në Shkodër ka humbur kontaktet me familjen.
Babai i tij, shtetasi Agim Bibaj tregon se i biri 15 vjeçar është nisur në mëngjes për në shkollë, por nuk është futur në mësim duke u larguar në drejtim të paditur.
Që nga ai moment nuk ka shkuar në shtëpi gjë e cila ka alarmuar familjen e tij. Babai ka bërë menjëherë denoncim pasditen e 11 nëntorit në policinë vendore të Shkodrës.
Efektivët janë angazhuar për të gjetur se ku ndodhet 15 vjeçari dhe se përse është larguar. Agim Bibaj i bën thirrje kujtdo që mund ta ketë parë djalin e tij që ta njoftojnë.
Po ashtu ka një thirrje edhe për të birin duke i thënë që të kthehet sa më parë sepse e kërkojnë nëna, vëllezërit dhe motra.
Arsyeja e largimit sipas babait është se ai i ka bërtitur djalit të tij që të mos bëjë sjellje të keqe dhe sipas tij, nga frika ai i ka treguar shokëve se do të largohet nga banesa.
“Djali më ka humb dje. Ka shkuar për në shkollë, shokët e tij kanë shkuar në shkollë, ai nuk ka shkuar. Kam ikur në punë herët. Kur jam kthyer më ka thënë nusja që nuk është kthyer akoma. Policia ka bërë gjithë kërkimet, por akoma nuk është gjetur gjë”, tha Bibaj.
Bibaj thotë se nuk ka ushtruar dhunë fizike ndaj tij por vetëm e ka këshilluar si çdo prind që te ketë një sjellje të mirë në shoqëri gjë për të cilën dyshon se i biri është irrituar duke vendosur të largohet nga banesa.
“Kishte bërë disa sherre dhe i kam bërtitur. Ai i kishte thënë shokëve të vet që ‘kam frikë të shkoj në shtëpi se mos më rreh babai, do iki në Tiranë’. I kam bërtitur vetë, që të mos bëjë sherre me njeri”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
