.png)
Gazeta Si – Edhe pse po hetohen për të njëjtat akuza, ndryshe nga ish-bashkëshorti i saj Ilir Meta, Monika Kryemadhi duket se i ka shpëtuar arrestit me burg për arsye shëndetësore dhe familjare.
Sipas dosjes hetimore, Gjykata e Posaçme, gjatë caktimit të masës së sigurisë, vlerësoi gjendjen shëndetësore, ekonomike, shoqërore e familjare të saj.
Gjatë hetimit, ka rezultuar e dokumentuar Kryemadhi i është nënshtruar ndërhyrjeve kirurgjikale dhe trajtimeve të ndryshme mjekësore dhe rrezikshmërinë shoqërore të veprave penale.
“Në lidhje me personin nën hetim Monika Kryemadhi, Gjykata vlerëson se në caktimin e masës së sigurimit personal ndaj saj duhen mbajtur në konsiderate këto kritere/rrethana: gjendjen ekonomike, shoqërore e familjare e saj, gjendjen shëndetësore të saj (gjatë hetimit ka rezultuar e dokumentuar se i është nënshtruar ndërhyrjeve kirurgjikale dhe trajtimeve të ndryshme mjekësore), rrezikshmërinë shoqërore të veprave penale për të cilat dyshohet duke u nisur nga masa e dënimit që parashikon secila prej tyre, mënyra e kryerjes se secilës prej tyre, rrezikshmërinë shoqërore të autorit, faktin që personi nën hetim po hetohet për katër vepra penale të ndodhura në kohë të ndryshme, faktin që personi nën hetim dyshohet se është recidivist specifik në veprën penale të “Korrupsionit”, si dhe përbërjen e gjendjes së saj familjare.
Gjykata vlerëson se të gjitha këto rrethana, e bëjnë të domosdoshme dhe në përputhje me nevojën e sigurimit caktimin ndaj personit në hetim Monika Kryemadhi të masës se sigurimit personal “Detyrimi për tu paraqitur ne policinë gjyqësore”, e parashikuar nga neni 234 i K.Pr. Penale.
Në vlerësimin e gjykatës kjo masë sigurimi personal është masa më e përshtatshme në raport me rëndësinë e fakteve të kryera nga personi nën hetim Monika Kryemadhi, si dhe masën e dënimit që parashikohet nga neni 260 i K.Penal, (katër deri në dymbëdhjetë vjet burgim), me masën e dënimit të parashikuar nga neni 287 i Kodit Penal (nga shtatë deri në pesëmbëdhjetë vjet burgim), me masën e dënimit të parashikuar nga neni 257/a/2 i K. Penal (deri në tre vite burgim në maksimum) si dhe faktin që secili episod konsiderohet si vepër më vete. Masa e sigurimit “Detyrimi për tu paraqitur ne policinë gjyqësore” e parashikuar nga neni 234 i Kodit të Procedurës Penale për personin nen hetim Monika Kryemadhi, ishte e përshtatshme ne raport me rëndësinë e faktit”.
Ilir Meta është arrestuar për "korrupsion pasiv", "pastrim parash" dhe "mosdeklarim të të ardhurave". Të njëjtat akuza rëndojnë edhe ndaj deputetes Monika Kryemadhi, ish-gruas së tij, por ndaj saj është caktuar masa e sigurisë "detyrim paraqitjeje", - thuhet në dosjen hetimore.
Ndërkohë, në lidhje me këtë çështje është lënë në "arrest shtëpie" Pirro Xhixho, babai i deputetes së Partisë së Lirisë, Erisa Xhixho dhe në masën "detyrim paraqitjeje", Ema Çoku.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
