.png)
Nga Gazeta 'Si'- Ministrja e Punëve të Jashtme të Kosovës, Donika Gërvalla, në një panel diskutimi gjatë forumit Bled në Slloveni ka folur edhe për reagimet e aleatëve, në veçanti Shteteve të Bashkuara të Amerikës për veprimet e fundit të Qeverisë së Kosovës në Veri të vendit.
Gërvalla ka thënë se raporti i Kosovës me aleatët shkon shumë përtej punëve ditore që bëhen, duke kujtuar ndihmën e NATO-s për çlirimin nga Serbia e Sllobodan Millosheviçit.
“Raporti i Kosovës me partnerët shkon përtej punëve ditore që ne po bëjmë. Kosova është histori suksesi e Perëndimit. Kosova është një histori suksesi e SHBA-së dhe Evropës sepse na u dashtë NATO që të ndalte gjenocidin dhe të sillte liri për njerëzit tonë. Prandaj raporti ynë shkon shumë përtej asaj që ne jemi duke bërë në disa pjesë të vendit”, ka thënë Gërvalla.
Kryediplomatja kosovare ka përmendur edhe çështjen e Urës së Ibrit, duke thënë se do të vazhdohet hapja e urave, sepse ato s’janë për të mbetur aty me simbole të vjetra të Sllobodan Millosheviçit në një qytet të ndarë.
“Ajo çfarë po bëjmë, kemi pasur diskutim për hapjen e urave, po pra do të vazhdojmë të hapim urat, sepse ato janë për të bashkuar njerëzit dhe qytetet, urat s’janë për të mbetur aty me simbolet e vjetra të Sllobodan Millosheviçit në qytet të ndarë. Do të vazhdojmë të ofrojmë për të gjithë për të jetuar në paqe dhe siguri në vendin tonë”, është shprehur ajo.
Gërvalla në fjalën e saj duket se i ka çuar mesazh edhe Ndihmës Sekretarit të Shtetit, Obrien, i cili kishte quajtur veprimet e Kosovës në Veri të pa koordinuara dhe provokative. Ministrja e Jashtme ka thënë se veprimet e Kosovës s’janë provokim për askënd dhe se provokim për Serbinë është vetë ekzistenca e shtetit dhe Republikës së Kosovës.
“S’do të ndalemi së bëri gjënë e duhur, sepse në anën tjetër të kufirit s’janë të interesuar të shohin Kosovën duke prosperuar. Dhe për të qenë e hapur dhe e sinqertë me ju, ajo që po bëjmë s’është provokim për askënd, ekzistenca jonë si Kosovës, si Republikë, është provokim për fqinjin tonë verior. Por s’mund të zhdukemi dhe jemi aty për të qëndruar”, ka thënë më tej Gërvalla.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
