Konsumimi i mishit të përpunuar ose të kuq rrit rrezikun e diabetit të tipit 2, me vetëm dy feta proshutë në ditë që rrisin rrezikun me 15%, sugjeron studimi më i madh i këtij lloji.
Hulumtimi i udhëhequr nga Universiteti i Kembrixh dhe që përfshin 2 milionë njerëz në mbarë botën ofron dëshminë më gjithëpërfshirëse të një lidhjeje midis mishit dhe sëmundjes që paraqet një nga rreziqet më urgjente për shëndetin global.
Më shumë se 400 milionë njerëz janë diagnostikuar me diabet të tipit 2, i cili është shkaku kryesor i verbërisë, problemit të veshkave, sulmeve në zemër, goditjeve në tru dhe amputimit të gjymtyrëve të poshtme. Përveç mbajtjes së një peshe ideale dhe lëvizjes më shumë, provat sugjerojnë se një nga mënyrat kryesore për të ulur rrezikun e sëmundjes është përmirësimi i dietës.
Ekspertët që kryen një meta-analizë të të dhënave që përfshinin 1.97 milionë të rritur nga 20 vende në të gjithë Evropën, Amerikën, Mesdheun Lindor, Azinë Juglindore dhe Paqësorin perëndimor thonë se rezultatet mbështesin rekomandimet për të kufizuar konsumin e mishit të përpunuar dhe të kuq.
Gjetjet e tyre u publikuan në revistën Lancet Diabetes & Endocrinology.
Profesoresha Nita Forouhi, e Universitetit të Kembrixh, autore e studimit, tha se kërkimi ofron provat më gjithëpërfshirëse deri më tani të një lidhjeje midis ngrënies së mishit të përpunuar e mishit të kuq të papërpunuar dhe një rreziku më të lartë në të ardhmen për diabetin e tipit 2. Ai mbështet rekomandimet për të kufizuar konsumin e mishit të përpunuar dhe mishit të kuq të papërpunuar për të reduktuar rastet e diabetit të tipit 2 në popullatë.
Studiuesit analizuan të dhënat nga 31 grupe studimore përmes InterConnect, një projekt i financuar nga BE për të kuptuar më shumë rreth diabetit të tipit 2 dhe obezitetit në popullata të ndryshme.
Ata zbuluan se konsumi i zakonshëm ditor i 50 g mish të përpunuar, ekuivalent me dy feta proshutë, lidhej me një rrezik 15% më të lartë të diabetit të tipit 2 në 10 vitet e ardhshme.
Konsumimi i 100 g mish të kuq të papërpunuar në ditë, ekuivalenti i një biftek të vogël, u shoqërua me një rrezik 10% më të lartë të sëmundjes.
Konsumimi i përhershëm i 100 g mish shpendësh në ditë u shoqërua me një rrezik 8% më të lartë. Kur u kryen analiza të mëtejshme për të testuar gjetjet në skenarë të ndryshëm, lidhja për konsumin e shpendëve u bë më e dobët, por lidhjet me diabetin e tipit 2 për mishin e përpunuar dhe mishin e kuq të papërpunuar vazhduan, zbuluan studiuesit.
Autori kryesor, Dr Chunxiao Li, gjithashtu nga Kembrixh, tha se ndërsa studimet e mëparshme kishin bashkuar rezultatet ekzistuese, analiza e re shqyrtoi të dhënat nga pjesëmarrësit individualë në secilin studim.
Kjo teknikë, tha Prof Nick Wareham, drejtor i njësisë së epidemiologjisë MRC në Kembrixh i lejoi studiuesit të “sigurojnë më shumë prova konkrete të lidhjes midis konsumit të llojeve të ndryshme të mishit dhe diabetit të tipit 2 sesa ishte e mundur më parë”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
