.png)
Nga Gazeta 'Si'- Shefi për Politikë të Jashtme dhe Siguri i Bashkimit Evropian, Josep Borrell, pak para përfundimit të mandatit të tij, ka bërë të ditur se do të vazhdojë përpjekjet për hapa konkretë lidhur në procesin e dialogut mes Kosovës dhe Serbisë.
Borrelli në një shkrim në EEAS ka thënë se kryenegociatorët do të takohen javën e ardhshme në Bruksel.
“Fatkeqësisht, takimi i dialogut këtë javë nuk solli ndonjë përparim në zbatimin e marrëveshjes. Diskutimet ishin po aq të vështira sa gjithmonë dhe në fund nuk pati as një takim ballë për ballë midis Presidentit dhe Kryeministrit. Serbia ishte e gatshme të takohej, por Kosova kërkoi nga unë të përcjell një grup parakushtesh.
Aktualisht, pozicionet e të dyja palëve mbeten larg njëra-tjetrës. Megjithatë, puna do të vazhdojë: Kryenegociatorët e të dyja palëve ranë dakord të vijnë në Bruksel javën e ardhshme për të punuar në hapa konkretë për të zhbllokuar zbatimin e Marrëveshjes”, tha Borrelli.
Ai u shpreh se kanë bërë shumë gjatë viteve të fundit, por se procesi mund të përparojë vetëm aq shpejt sa janë të gatshme të ecin të dyja palët.
“Lehtësimi i BE-së nuk mund të arrijë më shumë normalizim se sa dëshirojnë Kosova dhe Serbia. Pas disa muajsh, njerëz të ndryshëm do të jenë përgjegjës për këtë dosje në Bruksel, por pritshmëritë e Bashkimit Evropian dhe të Shteteve Anëtare të saj nuk do të ndryshojnë. Angazhimet dhe detyrimet e Kosovës dhe Serbisë nuk do të zhduken”, theksoi Borrelli.
Ai shtoi se nevojitet guxim, vizion dhe vullnet politik dhe se BE-ja do të vazhdojë të ndihmojë në çdo hap gjatë rrugës.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
