Mikroplastika e ndodhur në paketimin e ushqimeve mund të hyjë në penis dhe të shkaktojë probleme seksuale, kanë paralajmëruar ekspertët.
Zbulimi u bë nga studiues të cilët ekzaminuan indet penile të burrave që i nënshtroheshin një operacioni për mosfunksionim erektil dhe gjetën grimcat e vogla në tetë nga dhjetë mostra të mara.
Ata e etiketuan zbulimin ‘shqetësues’ dhe pretenduan se mikroplastika mund të ndikonte në funksionin e muskujve të penisit.
Mikroplastikat janë fragmente plastike të vogla sa dy mikrometra, ose dy të mijëtat e milimetrit.
Këto grimca hyjnë në ushqim, ujin e pijshëm dhe madje edhe në ajër kur produktet plastike degradohen natyrshëm.
Studimet e fundit kanë identifikuar mikroplastikë në indet e mushkërive të njeriut, në indet e placentës së nënës dhe fetusit, në qumështin e gjirit të njeriut dhe në gjakun e njeriut.
Një numër në rritje i kërkimeve tashmë i ka lidhur ato me zhvillimin e kancerit, sëmundjeve të zemrës dhe demencës, madje edhe me spermën me cilësi më të ulët.
Dr Ranjith Ramasamy, bashkautor i studimit të fundit dhe ish-drejtor i urologjisë riprodhuese në Universitetin e Majamit, tha: “Penisi është një organ vaskular, sfungjer, kështu që është padyshim i prekshëm. Gjatë ereksionit, një e pesta e vëllimit të gjakut në të gjithë trupin pompohet në penis”.
“Ne e dimë se disfunksioni erektil është multifaktorial. Ju nevojiten hormone të mira, nerva, furnizim me gjak dhe inde të mira të muskujve të lëmuar që të ndodhë një ereksion. Ne zbuluam se mikroplastika ishte e pranishme në muskujt e lëmuar të penisit. Gjithçka që dimë është se ata nuk supozohet të jenë aty dhe dyshojmë se kjo mund të çojë në mosfunksionim të muskujve të lëmuar”, u shpreh Ramasamy.
“Si shoqëri, ne duhet të jemi të vetëdijshëm se pirja e ujit nga shishet plastike, marrja e ushqimit në enë plastike dhe, akoma më keq, ngrohja e ushqimit me mikrovalë në enë plastike, po kontribuojnë në praninë e gjërave në trupin tonë që nuk duhet të jenë atje”, tha ai.
Studiuesit, të cilët analizuan indet penile, zbuluan se pothuajse gjysma (47.8 për qind) e mikroplastikës ishin tereftalat polietileni, i përdorur zakonisht për të bërë rroba dhe paketime ushqimore dhe pijesh.
Polipropileni – një mikroplastikë më e fortë që përdoret gjithashtu në paketim – formoi më shumë se një të tretën (34.7 për qind) të substancave.
Disa ishin të mëdha deri në gjysmë milimetri.
“Studimi ynë paraqet një hetim novator në praninë e mikroplastikës në indet e penisit. Zbulimi i mikroplastikës në indet e penisit ngre pyetje mbi pasojat e ndotësve mjedisorë në shëndetin seksual”, thanë shkencëtarët në prezantimin e studimit të tyre në Revistën e Mjekësisë Seksuale.
Disfunksioni erektil, njohur në zhargonin e përditshëm me termin impotencë seksuale, përkufizohet si pamundësia për të arritur ose mbajtur një ereksion të mjaftueshëm gjatë kryerjes së marrëdhënieve seksuale.
Disfunksioni erektil është problemi më i shpeshtë seksual dhe shfaqet në të paktën 50% të meshkujve mbi 50 vjeç. Kjo problematikë është një gjendje që ndikon negativisht në cilësinë e jetës së një personi dhe marrëdhënieve në çift. Impotenca mund të shkaktojë mungesë vetëbesimi, depresion, probleme familjare dhe madje edhe situata negative si divorci.
Megjithëse shkaku mendohej të ishte psikologjik në të kaluarën, disfunksioni erektil mund të vijë si pasojë e shumë sëmundjeve të tjera. Problematikat kardivaskulare, që konsistojnë në bllokimin e enëve që furnizojnë me gjak organin seksual, mund të bëhen shkaktarë për mosfunksionimin erektil.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
