Efekti pozitiv i një gjumi të mirë njihet gjerësisht dhe shpjegimi shkencor ka qenë se truri i pastron toksinat gjatë gjumit.
Megjithatë, gjetjet e reja sugjerojnë se kjo teori, e cila ka gjetur vend edhe në neuroshkencë, mund të jetë e gabuar. Studimi zbuloi se pastrimi i toksinave në trurin e minjve, në fakt, u reduktua dukshëm gjatë gjumit.
“Duket si një ide fituese e çmimit Nobel,” thotë Nick Franks, profesor i biofizikës në Imperial College London.
Në studimin e fundit, të botuar në revistën Nature Neuroscience, studiuesit përdorën një ngjyrë fluoreshente për të studiuar trurin e minjve. Kjo i lejoi ata të shihnin se sa shpejt ngjyra lëvizte nga barkushet në rajone të tjera të trurit dhe u mundësoi atyre të masin shkallën e pastrimit nga truri drejtpërdrejt.
Studimi tregoi se pastrimi i bojës u reduktua me rreth 30% te minjtë e fjetur dhe 50% te minjtë që ishin nën anestezi, krahasuar me minjtë që mbaheshin zgjuar.
“Fusha ka qenë kaq e fokusuar në idenë e pastrimit të toksinave si një nga arsyet kryesore pse ne flemë, dhe sigurisht që ishim shumë të befasuar kur vëzhguam të kundërtën në rezultatet tona,” tha Franks.
Studiuesit parashikojnë se gjetjet do të shtrihen tek njerëzit pasi gjumi është një nevojë thelbësore e përbashkët nga të gjithë.
Bill Wisden, drejtori i Institutit të Kërkimeve në Imperial College London dhe bashkëautori kryesor, tha se ka shumë teori se pse ne flemë dhe “megjithëse kemi treguar se pastrimi i toksinave mund të mos jetë një arsye kryesore, nuk mund të diskutohet se gjumi është i rëndësishëm.”
Gjetjet kanë rëndësi për hulumtimin e demencës për shkak të provave në rritje të një lidhjeje midis gjumit të dobët dhe rrezikut të Alzheimerit. Nuk ka qenë e qartë nëse mungesa e gjumit mund të shkaktojë Alzheimer, apo nëse është thjesht një simptomë e hershme.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
