Nga Gazeta Si- “Në fillim nisi si qejf. Shokët më kishin thënë të merrja pije energjike, sidomos kur isha turni i natës dhe duhet të rrija zgjuar. Por më vonë u bë e pamundur të mos merrja deri në 5 të tilla gjatë ditës.”
Sildi, 23-vjeç, teknik audio në një prej televizioneve kombëtare, thotë se prej 5 vitesh konsumon rregullisht pije energjike. Ai punon 2 punë dhe orari i tij zgjat përtej mesnatës.
“E kam të pamundur të rri zgjuar vetëm me kafe. Pijet energjike më karikojnë, më japin energjinë e duhur”, thotë i riu.
Mjeku Gerald Kola, në urgjencën e spitalit të Traumës, thotë se po shtohen shumë rastet në urgjencë me gjendje të ankthit dhe çrregullime të gjumit.
I kontaktuar nga Gazetasi.al, mjeku Kola thotë se mosha nën 40-vjeç janë target grupi që kërkon ndihmë më së shumti.
“Unë e shoh shqetësuese konsumimin e lartë të pijeve energjike dhe fatkeqësisht moshat e reja, kryesisht djem, vuajnë nga varësia e tyre. Shpesh dëgjojmë në urgjencë që shkaqet e konsumimit lidhen me përmirësimin e humorit, gjendjes shpirtërore por dhe energjisë. Është për të ardhur keq që pas cigares e kafes, pijet energjike kërkohen si stimuluese të humorit të mirë, kur në fakt sportet, hobet janë ato që duhet të kultivojë njeriu brenda vetes”, thotë mjeku Kola.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
