.png)
Gazeta Si- Gjykata e Lartë ka lënë në fuqi sekuestron e 25 pasurive të Jamarbër dhe Argita Malltezit, pasi dhëndri i ish-kryeministrit Berisha është nën hetim për aferën e privatizimit të klubit sportiv "Partizani".
Trupa gjykuese e përbërë nga Ilir Panda, Sokol Binaj dhe Sandër Simoni nuk kanë pranuar rekursin e dhëndrit dhe vajzës së ish-kryeministrit Sali Berisha duke lënë në fuqi vendimin e Gjykatës së Posaçme të Apelit.
Bëhet fjalë për 25 pasuri që janë vënë në sekuestro me kërkesë të SPAK-ut, në kuadër të hetimeve për procedurën e ndjekur për privatizimin e ish-kompleksit sportiv “Partizani”, ku Jamarbër Malltezi akuzohet për korrupsion dhe pastrim parash.
Ndër pronat e sekuestruara janë disa apartamente, disa llogari bankare, një vile në Gjirin e Lalëzit dhe kuotat e disa kompanive.
Malltezi u arrestua në tetor të 2023, për aferën e privatizimit të ish-kompleksit “Partizani” dhe pas një muaj qëndrimi në qeli u lirua nga gjyqtarja e Apelit, Iliriana Olldashi që caktoi masën e “arrestit shtëpiak”.
Gjykata e Apelit ndryshoi masën e sigurisë nga “arrest në burg” në “arrest shtëpie” për Malltezin. Nga ana tjetër ai dorëzoi rekurs në Gjykatën e Lartë kundër masës “arrest shtëpie”.
Ndërsa Sali Berisha, edhe ai në hetim për aferën e klubit sportiv 'Partizani", prej datës 30 dhjetor mbahet i izoluar në banesë për shkak se SPAK i kërkoi gjykatës ashpërsim të masës pasi nuk respektoi vendimin e parë të gjykatës.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
