Arinjtë Andri, Kassandra, Vini, Rina, Ari, Nala, Mali, Hana, Mira, Ero, Anik, Lena, Hope, Stivi, Ema, Oska, Roni, Tomi, Gjina dhe Pashuku janë banorët simpatikë të Parkut të Arinjve Prishtina. Vitin e fundit, ky park është pasuruar me ardhjen e luanit, Gjoni. Parku i Arinjve Prishtina është shtëpi e 20 arinjve të shpëtuar në Kosovë dhe Shqipëri./REL/
Më 2022, Parku i Arinjve Prishtina, u bë shtëpi edhe e luanit Gjoni, që u shpëtua në Shqipëri, ku po mbahej në një kafaz të një restoranti. Ky park, që ofron strehim të përhershëm për arinjtë e murrëm, ka siguruar që secili banorë i tij, të ketë një hapsirë prej 5.000 metrash katrorë.Megjithatë, nga janari deri në fillim të marsit, vizitorët nuk mund të shohin arinjtë, të cilët janë në gjumin dimëror. Brenda një viti, këtë park e frekuentojnë rreth 50 mijë vizitorë, prej tyre 10 mijë janë nxënës.Ata ushqehen tre herë në ditë, kryesisht me pemë dhe perime. Arinjtë në këtë park kanë një regjim strikt të ushqimit. Ky është Stivi, që është shpëtuar në Deçan më 2013. Ai është pothuajse i verbër, pasi kur po mbahej në izolim, ishte përfshirë në një luftë me një ari tjetër. Plagët që kishte marrë në sy, i ishin infektuar dhe nuk ishin trajtuar. Por, Stivi sot merr gjithë trajtimin e nevojshëm mjekësor që ofron Parku i Arinjve. Kur personeli i parkut i hedh ushqimin, Stivi dallohet nga arinjtë e tjerë, pasi ai me nuhatje arrin të gjejë shujtën e tij.Parku ka një hapësirë prej 16 hektarësh dhe rrethohet nga pyje të dendura të natyrës së paprekur. Ky park, që gjendet 20 kilometra larg kryeqytetit të Kosovës, Prishtina, është hapur për vizitor në maj të vitit 2013. Ema, Oska dhe Roni janë të vetmit arinj që nuk ndahen asnjëherë nga njëri-tjetri. Ata, së bashku, janë shpëtuar më 2014 nga organizata ndërkombëtare, FOUR PAWS, pasi po mbaheshin si kafshë shtëpiake në rajonin e Bjeshkëve të Nemuna. Që atëherë, ata kanë gjetur një shtëpi të sigurt në Parkun e Arinjve Prishtina.
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
