.png)
Shtëpia e Bardhë në Shtetet e Bashkuara të Amerikës u ka lënë afat 30 ditë agjencive qeveritare amerikane që të heqin nga celularët aplikacionin kinez të TikTok.
Reuters raporton se memorandumi i Shtëpisë së Bardhë u është dërguar të hënën agjencive qeveritare. Kjo bëhet për të garantuar sigurinë kibernetike të të dhënave të SHBA-së, pas dyshimeve se TikTok përdoret nga qeveria kineze për të grumbulluar informacionet personale të përdoruesve dhe për të spiunuar. Por kompania i mohon këto pretendime.
Me urdhrin e nxjerrë nga Shtëpia e Bardhë, të gjithë punonjësve të agjencive federale amerikane u lihet 30 ditë kohë që të fshijnë nga pajisjet TikTok-un.
Shumë agjenci qeveritare, përfshirë Shtëpinë e Bardhë, Departamentin e Mbrojtjes, Departamentin e Sigurisë Kombëtare dhe Departamentin e Shtetit e kanë ndaluar prej kohësh përdorimin e TikTok nga pajisjet qeveritare.
Të martën, Komiteti i Punëve të Jashtme të Dhomës së Përfaqësuesve do të votojë një projekt-ligj që do t’i jepte Presidentit Joe Biden autoritetin për të ndaluar TikTok nga të gjitha pajisjet e SHBA-së.
Një vendim të ngjashëm për punonjësit në zyrat shtetërore e ka ndërmarrë edhe Kanadaja.
Një javë më parë, edhe Bashkimi Europian nxori urdhër se aplikacioni TikTok nuk duhet të përdoret në zyrat e tyre ndërkohë që një urdhër i tillë pritet të jepet edhe në Itali.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
