Gazeta Si – Myrto Uzuni është lojtari më i mirë i momentit te kuqezinjtë dhe me siguri trajneri Silvinjo uron që ai ta ruajë këtë formë të shkëlyqer edhe për ndeshjet e Kombëtares. Beratasi ka shënuar edhe sot një gol shumë të bukur për Granadën në Spanjë.
Uzuni gjeti goditjen perfekte nga jashtë zonës në minutën e 28-të të ndeshjes ndaj Vilarrealit B në transfertë, duke e çuar topin në rrjetë me një trajektore fantastike. Granada e mbylli pjesën e parë në avanatzh të dyfishtë, 0-2, një rezultat që e mban këtë skuadër pranë zonës së ngjitjes në La Liga.
Vilarreal B është një kundërshtar që i sjell fat sulmuesit shqiptar. Në fazën e parë Uzuni ka shënuar tri herë në portën e kësaj skuadre. Me golat që po shënon dhe formën që po kalon, duket e vështirë që beratasi të qëndrojë te Granada verën e ardhshme.
Në momentin e festës së golit të Uzunit në stadium u inkuadrua nga telekamera edhe flamuri shqiptar, që ishte shpalosur nga disa tifozë shqiptarë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
