Gazeta Si – Trajneri kampion bote me Argjentinën, Lionel Skaloni, nuk e përjashton mundësinë për të drejtuar “Furitë e kuqe” në të ardhmen.
“Të drejtoj Spanjën? Pse, jo? Më ka dhënë shumë, është shtëpia ime e dytë. Çdo argjentinas do të thoshte të njëjtën gjë, sepse na kanë trajtuar jashtëzakonisht mirë. Ndihem pjesë e këtij vendi, por Spanja do të bënte mirë të kishte trajner spanjoll”, – ka thënë Skaloni në një intervistë për ‘Cadena Cope’.
“Botërori ishte një film dhe një udhëtim i pabesueshëm. Çelësi i kampionatit ishte ta shijonim atë, duke e ditur sa e vështirë do të ishte për këdo që do ta fitonte”, – ka shtuar Skaloni. Ai ka pohuar se që kur është kthyer nga Katari nuk e ka parë më finalen.
“Deri në minutën e 80-të e dija që do ishte një ndeshje spektakolare, ndërsa më pas ishte ndryshe. Kam në mendje imazhet e ndeshjes, mëkat që nuk e mbyllëm për 90 minuta”, – ka shtuar Skaloni.
Për preferencën mes Maradonës dhe Mesit, dy lojtarëve më të rëndësishëm të historisë së Argjentinës, trajneri u shpreh: “Nëse duhet të zgjedh njërin, preferoj Mesin, me të cilin kam diçka speciale. Është ai më i miri i historisë, edhe pse Maradona ka qenë i madh. Të stërvitësh Mesin nuk është e vështirë. Në nivelin teknik nuk mund të korrigjohet, për të presuar dhe ‘vjedhur’ topa është numri 1”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
