Gazeta Si – Me vonesë, por gjithsesi ka ardhur reagimi i presidentit të FSHF-së, Armand Duka, në lidhje me stadiumet e reja të Durrësit, Vlorës dhe Korçës, si dhe ‘Selman Stërmasin’ në kryeqytet.
Të enjten kryeministri Edi Rama dha lajmin për rikonstruksionin e këtyre stadiumeve, një proces që pritet të fillojë në pranverë. Megjithëse ky lajm u dha që në mesditë, nuk pati asnjë reagim nga FSHF, që një ditë më e pas e përshëndeti nismën me anë të kreut të saj.
“Lajm i mrekullueshëm për futbollin, që fillimin e vitit 2023 ta nisim me nismën për ndërtimin e tre stadiumeve të reja në Durrës, Vlorë e Korçë, qytete me traditë në futboll dhe me një popull futbolldashës në tribuna e shkallët e stadiumeve.
Këto tre stadiume do t’i shtohen kolanës së impianteve ekzistuese, duke rritur ndjeshëm investimet për lojën e bukur të futbollit. Këto investime, së bashku me projektin e “100 fushave” me bashkitë, janë një vlerë e shtuar për përmirësimin e infrastrukturës sportive në vendin tonë”, – shkruan Duka në faqen e tij në Facebook.
Për momentin nuk është e qartë se kush do ta kryejë investimin për stadiumet e reja, vetëm qeveria, apo në bashkëpunim me FSHF-në. Me shumë mundësi, këtë herë do të investojë vetëm qeveria, sepse në të kundërt FSHF me siguri do reagonte më parë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
