Gazeta Si – Dukej gjithçka e përfunduar, pritej zyrtarizimi, por transferimi i Enco Fernandez te Çelsi është kthyer në një mundje dore mes londinezëve dhe Benfikës. Raundin e fundit e ka fituar skuadra portugeze, që ka vendosur kushtet e veta.
Së pari Çelsi, nëse do 21-vjeçarin që fitoi Botërorin me Argjentinën dhe u shpall i riu më i mirë i kompeticionit, duhet të paguajë 120 milionë eurot e klauzolës. Të gjitha bashkë, jo me këste. Në të kundërt nuk bëhet asgjë.
Benfika nuk e ka ndryshuar pozicionin e saj edhe përballë insistimit të Fernandez, i cili ka lënë të kuptohet se dëshiron të largohet nga Lisbona për të shkuar në Londër sa më parë. Ai kërkon me çdo kusht Premier Ligën. Rui Kosta, drejtues i lartë i Benfikës, po bisedon me Çelsin, por ka bërë të qartë se klubi i tij nuk ka nevojë të shesë për të mbushur arkën.
E vetmja mënyrë që anglezët ta marrin Fernandez është pagesa e klauzolës menjëherë. Drejtuesit e Çelsit në fillim ishin dakord, pastaj duket se ndërruan mendje për shkak të ‘Fair Play’-it financiar. Pas më shumë se 300 milionë eurove të investuara në verë, ata janë në shënjestër të UEFA-s dhe Premier Ligës.
Pas llogarive të bëra, drejtuesit e Çelsit kuptuan se do ishte më mirë që t’i paguanin 120 milionë eurot që kërkon Benfika të ndara në 3 këste. Madje pagesa u rrit në 127 milionë, por portugezët pranojnë vetëm pagesën totale menjëherë.
Lëvizjet e Çelsit nuk i pëlqyen aspak trajnerit të Benfikës, Roger Shmidt. Ai ka folur për mungesë respekti nga ana e anglezëve, pasi në momentin final të pagesës së klauzolës deshën të vazhdonin bisedimet.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
