Gazeta Si – Homazhet në nderim të Pelé përfunduan afër mëngjesit të sotëm. I gjithë Brazili pati mundësinë t’i jepte lamtumirën legjendës së futbollit botëror. Pastaj ishte radha e familjarëve për të qarë njeriun e tyre më të dashur.
Një ceremoni private familjare, me përjashtim të disa legjendave të futbollit brazilian, si Zhairzinjo, Rivelinjo dhe Gerson. Trupi i ‘O Rei’, i shoqëruar nga një turmë prej rreth 200 mijë personash, u largua nga stadium ‘Vila Belmiro’ për të kaluar në plazhin e Santosit dhe pastaj pranë shtëpisë së nënës Çeleste Arantes dhe në fund për t’iu drejtuar ‘Memorial Necropole Ecumenica’, ku Pelé është varrosur.
Legjenda braziliane ndërroi jetë më 29 dhjetor, në moshën 82-vjeçare. Ai vetë kishte zgjedhur ‘Memorial Necropole Ecumenica’ si banesën e tij të fundit: “Më pëlqen struktura, si është organizuar dhe si pastrohet. Një vend që transmeton paqe dhe qetësi shpirtërore. Nuk duket fare si varrezë”, – kishte thënë Pelé, i cili gjithashtu donte që homazhet të bëheshin në ‘Vila Belmiro’.
Polemika të forta shpërthyen për sjelljen e Xhani Infantinos gjatë homazheve. Presidenti i FIFA-s është kritikuar shumë në rrjetet sociale për një selfie me persona të tjerë fare pranë arkivolit të ‘O Rei’. Një gjest i konsideruar i ulët dhe pa vend nga opinioni.
Vetë Infantino ka dashur të sqarojë gjithçka me një postim në profilin e tij në Instagram, duke shkruar: “Nuk do të bëja kurrë diçka që do te ishte mungesë respekti për Pelé. Ishte vetëm një sjellje kortezie pas një kërkese të disa ish-shokëve të tij të skuadrës”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
