Gazeta Si – Me anë të një deklarate të përbashkët, Shtetet e Bashkuara të Amerikës dhe Bashkimi Europian shprehen se janë të shqetësuar për siutuatën e vazhdueshme të tensionuar në veri të Kosovës dhe bëjnë thirrje për uljen e tensioneve.
Zëvendës zëdhënësi kryesor i Departamentit të Shtetit, Vedant Patel dhe Zëdhënësja e Përfaqësueses së Lartë të BE-së, Nabila Massrali ne deklaratën e përbashkët bëjnë të ditur se janë duke punuar me kryeministrin e Kosovës, Albin Kurti, dhe presidentin e Serbisë, Aleksandar Vuçiç, për të gjetur një zgjidhje politike që të ulen tensionet në veri të Kosovës.
“I bëjmë thirrje të gjithëve që të ushtrojnë përmbajtje maksimale, të ndërmarrin veprime të menjëhershme për të zbutur pa kushte situatën dhe të përmbahen nga provokimet, kërcënimet apo kërcënimet. Ne po punojmë me presidentin Vuçiç dhe kryeministrin Kurti për të gjetur një zgjidhje politike për të zbutur tensionet dhe për të rënë dakord për rrugën përpara në interes të stabilitetit, sigurisë dhe mirëqenies së të gjitha komuniteteve lokale”, thuhet në deklaratë.
Gjithashtu theksohet se “Mirëpresim garancitë e lidershipit të Kosovës që konfirmojnë se nuk ekzistojnë lista të qytetarëve serbë të Kosovës që do të arrestohen apo ndiqen penalisht për protesta/barrikada paqësore. Në të njëjtën kohë, sundimi i ligjit duhet të respektohet dhe çdo formë dhune është e papranueshme dhe nuk do të tolerohet”.
Sakaq SHBA dhe BE shprehen se të gjitha detyrimet e Dialogut duhet të zbatohen plotësisht pa vonesë.
“Shtetet e Bashkuara të Amerikës do të mbështesin Bashkimin Evropian përmes Misionit të Sundimit të Ligjit në Kosovë (EULEX), në përputhje me mandatin e tij, i cili mund të monitorojë nga afër të gjitha hetimet dhe procedurat pasuese për të promovuar respektimin e të drejtave të njeriut. Kjo përfshin, në veçanti, garancitë e gjykimit të drejtë, si dhe mbrojtjen dhe trajtimin e barabartë për pjesëtarët e komuniteteve jo shumicë në Kosovë. Ne gjithashtu presim që Kosova dhe Serbia të kthehen në nxitjen e një mjedisi të favorshëm për pajtimin, stabilitetin rajonal dhe bashkëpunimin për të mirën e qytetarëve të tyre”, thuhet më tej në deklaratë.
Që nga 10 dhjetori janë ngritur 14 barrikada në veri të Kosovës nga serbët, duke mbyllur tre pikat e kalimit kufitar në Jarinë, Bernjak dhe se fundmi ne Merdare.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
