Pas arritjes së një konsensusi të përkohshëm për targat mes Prishtinës dhe Beogradit, Bashkimi Europian ka ftuar sërish në dialog liderët kryeministrin Albin Kurti dhe presidenti serb Aleksander Vuçiç.
Lajmi u bë publik gjatë një konferencë për mediat nga Peter Stano, zëdhënësi i shefit të diplomacisë europiane, njëkohësisht zëvendëspresidentit të Komisionit Europian, Josep Borrell. Ai ka konfirmuar në konferencën e përditshme për shtyp të KE-së ftesën që i është bërë liderëve të Kosovës dhe Serbisë për të ardhur në ditët në vjijim në Bruksel lidhur me hapat e mëtejshëm për normalizimin e marrëdhënieve midis dy palëve.
“Përfaësuesi i lartë i BE-së i fton liderët, kryeministrin e Kosovês dhe presidentin e Serbisë që të vijnë së shpejti në Bruksel dhe të fillojnë diskutimet për kuadrin e gjerë. Dhe kuadri i gjerë është normalizimi midis palëve me lehtêsimin e BE-së.”
Stano deklaroi se janë duke punuar që të rikthejnë serbët e Kosovës në institucione, si një kërkesë e BE-së.
Ai ka thënë se është e rëndësishme që të respektohen marrëveshjet e arritura më parë në dialog, duke përfshirë edhe themelimin e Asociacionit.
Stano, ndër të tjera, është shprehur se puna do të vazhdojë, si dhe përfaqësuesi i lartë i BE-së, Josep Borrell, u ka bërë thirrje të dyja palëve që të vazhdojnë përpjekjet për stabilizimin e marrëdhënieve.
“Përfaqësuesi special Miroslav Lajçak është duke punuar natë e ditë që ky proces të avancojë. Lajçaku po ashtu do t’i ftojë të dy liderët të takohen dhe të diskutojnë për marrëveshjet e tjera”, u shpreh ndër të tjera ai.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
