Kuvendi nis dëgjesën me 15 kandidatët që duan të jenë anëtarë të Këshillit Mbikëqyrës të Bankës së Shqipërisë.
Komisioni parlamentar i Ekonomisë zhvillon sot seancën me 15 kandidatët që i janë përgjigjur thirrjes publike të Parlamentit më 4 tetor për plotësimin e tre vendeve vakante. Në mes të tyre është sërish emri i ish-ministrit të Financave në qeveritë socialiste, Arben Malaj. Ai ka qenë anëtar i Këshillit Mbikëqyrës të Bankës së Shqipërisë, pasi u zgjodh duke marrë mandatin e Ermelinda Meksit në këtë institucion. Mandati i tij ka përfunduar, pasi Malaj plotësoi atë të koleges së tij së dikurshme në qeverinë socialiste.
Malaj ka qenë një ndër figurat kryesore politike e njihej si një mbështetës ish-kryesocialistit Fatos Nano. Për shkak të përplasjeve në PS në vitin 2013 me kryesocialistin Edi Rama, Malaj kandidoi si i pavarur në zgjedhjet parlamentare në qarkun e Vlorës, por nuk fitoi.
Por, në vitin 2017 Malaj pati një afrim me PS-në. Më pas ai u zgjodh edhe si kryetar i Këshillit Ekonomik në Bashkinë e Tiranës, post i ofruar nga kryebashkiaku Erjon Veliaj.
Gjithashtu për anëtar të Këshillit konkurron edhe Leontijev Çuçi, ish-deputet i PS-së dhe drejtues i sekretariatit të kësaj partie gjatë kohës që PS-në e drejtonte Fatos Nano, dikur ka mbajtur edhe postet si ambasador i shtetit shqiptar në Itali dhe në Zvicër.
Ndër 15 emrat e tjerë është edhe Vjollca Braho, përfaqësuese e PDIU-së në Këshillin Bashkiak të Tiranës. Më parë, kur PDIU ishte në koalicionin qeverisës me PS-së, Braho mbajti postin dhe të zv.ministres në Ministrinë e Mirëqenies Sociale dhe Rinisë. Aktualisht është nënkryetare e këshillit bashkiak të Tiranës, anëtare e PDIU-së.
Për të qenë anëtar i Këshillit Mbikëqyrës së Bankës konkurron edhe Artan Hoxha, i cili ka qenë ministër i Tregtisë dhe Bashkëpunimit Ekonomik në vitin 1992-1993 gjatë qeverisë së drejtuar nga PD-ja me kryeministër Aleksandër Meksi.
Në garë janë edhe profesorët Luljeta Minxhozi dhe Sulo Hadëri.
Neni 161 i Kushtetutës përcakton se, Banka e Shqipërisë drejtohet nga një këshill, i cili kryesohet nga Guvernatori. Guvernatori zgjidhet nga Kuvendi me propozim të Presidentit të Republikës për 7 vjet, me të drejtë rizgjedhjeje.
Gjithashtu anëtarët e Këshillit Mbikëqyrës zgjidhen dhe emërohen nga Kuvendi i Republikës së Shqipërisë me një mandat 7-vjeçar, me të drejtë rizgjedhjeje.
Të gjithë anëtarët e Këshillit Mbikëqyrës zgjidhen dhe emërohen nga Kuvendi i Republikës së Shqipërisë, mbështetur në propozimet e bëra si më poshtë: -Pesë anëtarë propozohen nga Kuvendi; -Tre anëtarë propozohen nga Këshilli i Ministrave; -Një anëtar propozohet nga Këshilli Mbikëqyrës. Guvernatori zgjidhet nga Kuvendi, me propozimin e Presidentit të Republikës.
Këshilli Mbikëqyrës i Bankës së Shqipërisë zgjedh dhe emëron zëvendësguvernatorët, mbështetur në propozimin e bërë nga guvernatori.
Kandidatët për anëtarë të Këshillit Mbikëqyrës duhet të jenë persona që gëzojnë ndershmërinë dhe pastërtinë morale, si dhe kanë: arsimin e lartë ekonomik ose juridik; përvojë profesionale në çështje financiare dhe bankare; kualifikime profesionale të profilit; përvojë pune mbi pesë vjet në administratën publike ose në institucionet financiare dhe bankare; të mos kenë pengesa të parashikuara në nenin 47.
Fillimisht pati një debat në lidhje me mandatin e guvernatorit Genti Sejko, i cili u zgjodh në këtë detyrë pas shkarkimit të Ardian Fullanit. Por mbi bazën e interpretimeve Sejko do ta ushtrojë të plotë detyrën e tij, pas votimit që Kuvendi bëri më 5 shkurt të vitit 2015. Anëtarëve të KM-së së Bankës që iu ka përfunduar mandati janë Dhori Kule, Elisabeta Gjoni, Ela Golemi, Arben Malaj dhe Petraq Milo.
Pas kësaj seance dëgjimore, komisioni parlamentar i Ekonomisë do të hartojë një raport për kandidatët që vlerëson se mund të jenë anëtarë të Këshillit Mbikëqyrës të Bankës së Shqipërisë.
Lista e kandidatëve që kanë aplikuar në Kuvend
1- Vjollca Braho
2- Bardhyl Ceku
3- Leontijev Çuçi
4- Sulo Hadëri
5- Artan Hoxha
6- Altin Hoti
7- Oljan Kanushi
8- Genc Koxhaj
9- Arben Malaj
10- Visar Malaj
11- Luljeta Minxhozi
12- Ergys Misha
13- Nikollaq Pano
14- Drini Salko
15- Arben Xibri
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
