Dhurata e mirëseardhjes e Italisë për Melonin, një perspektivë më e keqe ekonomike

Giorgia Meloni dhe aleanca e saj nuk do të kenë nevojë të presin gjatë për të parë se sa është përkeqësuar perspektiva ekonomike e vendit.

Projeksionet tregojnë se ekonomia do të zgjerohet vetëm 1% vitin e ardhshëm, më pak se gjysma e parashikimit prej 2.4% në prill, sipas njerëzve të njohur me këtë çështje, të cilët nuk pranuan të identifikoheshin sepse detaje të tilla janë konfidenciale.

Parashikimi më i ulët i rritjes do të ketë ndikim negativ në deficit. Kjo do të intensifikojë sfidën për koalicionin e krahut të djathtë.

Edhe atëherë, një perspektivë e tillë mbetet shumë mbi konsensusin se sa e keqe do të jetë realisht rritja. Një sondazh i 34 ekonomistëve i kryer nga Bloomberg parashikon se ekonomia italiane do të zgjerohet vetëm 0.4% vitin e ardhshëm, nga 3.3% në 2022.

Draghi dhe ministri i Financave Daniele Franco kanë thënë javët e fundit se për momentin, Italia mund të shmangë një tkurrje ekonomike. Kryeministri ka vënë në dukje gjithashtu se të ardhurat më të larta nga taksat, pjesërisht të rritura nga inflacioni i përshpejtuar, i kanë dhënë një shtysë të vogël financave publike.

Kjo mund të jetë një ngushëllim i vogël për qeverinë e re, e cila do të përballet me një perspektivë të përkeqësuar ekonomike të ngarkuar me pasiguri. Pushtimi rus i Ukrainës, rritja e çmimit të energjisë, inflacioni i shfrenuar dhe rritja e normave të interesit janë të gjitha kombinuar për të dëmtuar rritjen.

Një perspektivë më e dobët për zgjerim nënkupton më pak hapësirë fiskale për ndërhyrje për të ndihmuar familjet dhe bizneset të përballen me krizën aktuale, përveç nëse politikanët përdorin shtimin e ngarkesës së madhe të borxhit të vendit. Italia deri më tani ka shpenzuar rreth 66 miliardë euro për të mbrojtur ekonominë e saj.

Meloni është zotuar të mbajë nën kontroll financat publike, por gjithashtu ka premtuar të mbrojë italianët nga më e keqja e krizës së energjisë. Me rritjen e kostove dhe çmimeve, ky do të jetë një akt i vështirë balancimi.

Edhe vetëm zgjatja e lehtësimit të taksave për kompanitë që përdorin shumë energji deri në muajin dhjetor do të kushtonte pothuajse 5 miliardë euro, tha një nga njerëzit.

Burimi: Bloomberg; Përshtati Gazeta Si

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.