Gazeta Si – Start kampioni për Milanin. Në ndeshjen hapëse të kampionatit 2022-2023, kuqezinjtë mundën 4-2 Udinezen. Një fitore jo shumë e lehtë, në fakt. Milani ia doli të përmbysë Udinezen, falë një Ante Rebiç në formë shumë të mirë.
Ndeshje nisi me një malore për skuadrën e Stefano Piolit, që pësoi gol pas 2 minutash. Megjtihatë, reagimi ishte i shpejtë. Teo Hernandez barazoi me penallti, kurse Rebiç i kaloi kuqezinjtë në avantazh brenda pak minutash. Udineze gjeti forca dhe barazoi para se të mbyllej pjesa e parë.
Sapo nisi e dyta Brahim Diaz i dha avantazhin ekipit të tij, duke shfrytëzuar një gabim të mbrojtjes mike. Rebiç më pas shënoi golin e 4-t dhe të 2-tin personal. Milani fitoi sigurinë e duhur pas këtij goli.
Trajneri Pioli, në avantazhin e 2 golave, freskoi krejtësisht sulmin, duke hedhur në fushë Salemaekers, De Ketelaere, Zhiru dhe Origin. Kampionët e ruajtën avantazhin pa shumë probleme dhe në fund iu gëzuan fitores së parë të kampionatit. Mbrojtja e titullit ka nisur në mënyrën më të mirë.
Ndeshjen e parë e ka fituar edhe Atalanta e Gjimshitit, që mposhti Sampdorian në fushën e saj, me rezultatin 0-2. Mbrojtësi i Kombëtares luajti 90 minuta në këtë ndeshje.
Interi fitoi 1-2 në fushën e Leçes. Me fat zikaltrit, të cilët e gjetën golin e fitores në minutën e 5-të shtese me Dumfris. Lukaku realizoi pas 2 minutash lojë, por Leçe barazoi me Cise dhe e vuri në vështirësi ekipin e Inzagit. Kristjan Asllani nuk luajti asnjë minutë në këtë ndeshje.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
