Paul Pogba dëmtoi meniskun në miqësoren ndaj Guadalajara Chivas dhe do të mungojë në ndeshjet e para të sezonit të ri me Juventusin, klub ku u rikthye me parametra zero pas gjashtë sezoneve të kaluara tek United.
29-vjeçari refuzoi ndërhyrjen kirurgjikale pavarësisht insistimit të klubit italian, pasi ai nuk dëshiron të rrezikojë pjesëmarrjen në Botërorin e Katarit, që do të zhvillohet në periudhën 21 nëntor-18 dhjetor.
Trajneri i kombëtares franceze, Didier Deschamps ka qetësuar tifozët me prononcimin e fundit për Le Parisien, aty ku thekson se mesfushori do të jetë i pranishëm në Botërorin e këtij viti.
Tekniku i kampionëve të botës komenton situatën në mesfushë, repart ku përveç Pogba është tepër i rëndësishëm edhe N’Golo Kante, i cili nuk ndodhet në formë të mirë sportive për shkak të probleme fizike.
Gjithsesi, Deschamps nuk është aspak i shqetësuar. “Po flasim për lojtarë tepër të kërkuar dhe me eksperiencë të madhe. Është e rëndësishme që ata të jenë të pranishëm në Botëror, por kurrë nuk jemi të sigurt.
Pogba? Natyrisht që jam në kontakt të vazhdueshëm me Paul. Pjesëmarrja e tij në Botëror nuk është fare në diskutim”, deklaroi 53-vjeçari francez. (Supersport)
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
