Presidentja e Kosovës, Vjosa Osmani ka folur për BBC-në, pas situatës së krijuar në veri të vendit ku ka pranuar se tensionet po përshkallëzohen.
“Tensionet po përshkallëzohen. Megjithatë ka pasur përgatitje nga Serbia, e ndihmuar dhe nxitur nga Rusia për një kohë të gjatë, për të tentuar përshkallëzimin e Ballkanit Perëndimor në përgjithësi dhe në Kosovë në veçanti”, ka deklaruar Osmani.
Ajo tha se veriu po mbetet i tensionuar pasi presidenti i Serbisë Aleksandar Vuçiç, me strukturat kriminale në veri po mbajnë peng serbët që jetojnë në Kosovë, ndërsa shtoi se Kosova kurrë nuk ka kontribuar dhe nuk do të kontribuojë në përshkallëzim ose dhunë.
“Por ne duhet të kuptojmë se jetojmë afër një fqinji që kontrollohet plotësisht nga Rusia. Ata po luftojnë mënyrën tonë demokratike të jetës, kjo është një luftë kundër vlerave me të cilat jetojmë çdo ditë dhe të cilat qëndrojnë në themelet e shtetit tonë.
Kosova është një histori suksesi se çfarë mund të arrijë bota demokratike kur qëndron e bashkuar kundër tiranive dhe kundër regjimeve gjenocidale. Së dyti, Kosova është një histori suksesi sot, sepse është një demokraci e zhvilluar. Është një ekonomi në zhvillim e sipër”, deklaroi Osmani.
Ajo i ka dërguar mesazh Putinit përmes kësaj interviste, ndërsa tha se Serbia dhe Rusia janë të interesuara për të rikthyer tensionet rajonin tonë. “Ne nuk do të lejojmë këtë. Ne nuk do të biem pre e këtyre provokimeve”, shtoi ajo.
“Ai do të dështojë, ai do të dështojë në Ukrainë dhe ai do të dështojë absolutisht në qëllimet e tij kur bëhet fjalë për destabilizimin e Ballkanit Perëndimor përmes satelitit të tij, Serbisë”, ishte mesazhi i Osmanit.
Ajo po ashtu ka porositur serbët e Kosovës se institucionet po punojnë që të gjithë në Kosovë të ndihen të barabartë.
“Dhe unë dua që t’i siguroj të gjithë qytetarët tanë, veçanërisht qytetarët tanë serbë, se ne të gjithë po punojmë që të gjithë të ndihen të barabartë, të gjithë të ndihen të integruar në shoqërinë tonë. Si dhe në institucionet tona. Dhe askush nuk duhet të bjerë pre e propagandës ruse dhe serbe”, tha Osmani në fund të intervistës.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
