Policia e Kosovës njoftoi se situata në veri të vendit mëngjesin e së hënës mbetet relativisht e qetë, por dy rrugët që të çojnë në pikat e kalimit kufitar të Jarinjës dhe Bërnjakut mbeten të bllokuara.
Veç automjeteve, bllokadave iu bashkuan edhe qytetarë serbë, kryesisht punonjës të administratës arsimore e shëndetësore që u urdhëruan më parë nga strukturat paralele serbe që të dalin e të përforcojnë bllokadat e vendosura në rrugë.
Në dy pikat kufitare të bllokuara, autoritetet e Kosovës thanë se kanë nisur zbatimin e reciprocitetit, duke e kushtëzuar shtyrjen e këtij vendimi për në 1 shtator vetëm kur të hiqen bllokadat e vendosura nga serbët. Ndërkohë, në Mitrovicën e Veriut janë shfaqur pankarta me mesazhe për bashkësinë e komunave me shumicë serbe.
“Mirë se vini në Asociacionin e komunave me shumicë serbe”, shkruhet në pankartat dhe banerat e vendosura në qytet. Pavarësisht kësaj, situata mbetet e qetë.
Nga ana tjetër, Policia e Kosovës njoftoi se në të paktën 4 raste udhëtarët shqiptarë kanë rënë pre e dhunës dhe vandalizimit të protestuesve serbë. Në njërin prej tyre, persona të armatosur dhe të maskuar pasi kanë dhunuar një familje shqiptare u kanë marrë edhe makinën.
Mesazhe për vetëpërmbajtje për të dyja palët kanë dërguar kancelaritë më të mëdha të perëndimit. Brukseli përshëndeti vendimin e Qeverisë për ta shtyrë zbatimin në 1 shtator dhe kërkoi heqjen pa vonesa të barrikadave.
Shtyrja e zbatimit të vendimit ishte një kërkesë e drejtpërdrejt e Shteteve të Bashkuara të Amerikës, që iu përcoll qeverisë së Albin Kurtit përmes Ambasadës në Prishtinë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
