Presidentja e Kosovës, Vjosa Osmani dhe kyeministri Albin Kurti do të priten sot (26 korrik) në takim nga skretari amerikan i Shtetit, Antony Blinken.
Përmes një njoftimi për media nga Presidenca mësohet se në fokus të diskutimeve do të jetë thellimi i partneritetit bilateral Kosovë – SHBA në nivel strategjik, angazhimi i përbashkët në drejtim të adresimit të sfidave ndaj paqes dhe sigurisë në rajon dhe Europë, si dhe mbështetja për Kosovën në sektorët strategjikë.
“Takimi me sekretarin e Shtetit,Blinken, do të mbahet në një periudhë përcaktuese për sigurinë dhe paqen në rajonin tonë, si dhe për kontinentin europian e më gjerë si pasojë e luftës së Rusisë në Ukrainë”, thotë Presidenca.
Më tej thuhet se në takim presidentja Osmani do të kërkojë vazhdimin e mbështetjes amerikane për forcimin e pozitës ndërkombëtare të Kosovës, duke përfshirë edhe anëtarësimin në organizata ndërkombëtare.
“Ajo do ta informojë sekretarin Blinken edhe për hapat të cilat i ka ndërmarrë Kosova në avancimin e rrugëtimit euroatlantik, si dhe për angazhimin aktiv të institucioneve të Kosovës në drejtim të zbatimit të reformave në fushën e sundimit të ligjit.
Me qëllim të hapjes së kapitujve të rinj të bashkëpunimit nën kornizën e partneritetit bilateral strategjik, do të diskutohet edhe për intensifikimin e bashkëpunimit në fushën e mbrojtjes, ekonomisë, si dhe fusha të tjera të rëndësisë së veçantë.
Takimi do të mbahet sot në Departamentin Amerikan të Shtetit, në orën 16:30, sipas orës lokale në Washington D.C., respektivisht në orën 22:30, sipas kohës së Kosovës”, thuhet në njoftim.
Osmani dhe Kurti ndodhen në Shtetet e Bashkuara të Amerikës pasi dje morën pjesë në ceremoninë e organizuar në Kongresin amerikan për nënshkrimin e marrëveshjes me Korporatën e Sfidave të Mijëvjeçarit (MCC), për Programin Kompakt të Kosovës.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
