Gazeta Si – Zllatan Ibrahimoviç do të luajë me Milanin edhe për një vit. Rinovimi i sulmuesit suedez ishte gati dhe ishte parashikuar për këtë javë. Sot ka ardhur zyrtarizimi dhe firma në kontratë.
Ibrahimoviç do të ketë një pagë me një pjesë fikse shumë më të ulët se sezonin e kaluar (7 milionë). Pjesa tjetër lidhet me bonuset. Edhe në këtë rast Milani do të shfrytëzojë avantazhet fiskale që lidhen me të ashtuquajturin “Dekreti rritje”.
Në postimin e bërë në faqen zyrtare në Tuiter, klubi kuqezi saktëson se sulmuesi veteran do të veshë sërish fanellën me numër 11.
Ibrahimoviç ka firmosur deri në vitin 2023. Do të jetë sezoni i tij i 5-të me fanellën kuqezi, me objektiva të tjerë për të arritur.
Official Statement: @Ibra_official ➡️ https://t.co/8BgZOIZ2Lv
— AC Milan (@acmilan) July 18, 2022
Comunicato Ufficiale: Zlatan Ibrahimović ➡️ https://t.co/0A2sQdJppp#ReadyToLeaveAMark #SempreMilan pic.twitter.com/GN44NS1cLJ
Tani futbollisti 40-vjeçar mund të përqendrohet te rikuperimi, pas ndërhyrjes në gjurin e majtë që kreu sapo fitoi titullin me Milanin. Ditët e fundit ai ka bërë disa seanca rehabilituese, duke postuar në rrjetet sociale progresin drejt rikthimit në fushë.
Objektivi është që sulmuesi të jetë gati në fillim të 2023-shit, por nuk ka ende një datë precize. Duke pare moshën dhe gjendjen fizike të përgjithshme, Milani do të presë me durim rikthimin e suedezit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
