Është votuar në lexim të parë, projektligji për Byronë Shtetërore për Verifikimin dhe Konfiskimin e Pasurisë së Pajustifikueshme.
Ky projektligj ka kaluar vetëm me votat e pozitës, 58 vota për dhe 3 abstenime, dhe pa mbështetjen e opozitës.
Ndër deputetët që ka abstenuar është edhe kryetari i Kuvendit, Glauk Konjufca.
Me këtë projektligj parashikohet që të gjithë zyrtarët publikë në Kosovë mund të jenë subjekt i verifikimit të pasurisë nëse ekzistojnë dyshime se ajo është fituar në mënyrë të kundërligjshme. Përveç tyre, verifikimi dhe konfiskimi i pasurisë së pajustifikueshme do bëhet edhe për anëtarët e familjes së tyre dhe palëve të treta, që nënkupton personat te të cilët dyshohet se është bartur pasuria e zyrtarëve publikë.
Kryeministri Albin Kurti, tha se është e rëndësishme që të takohen si subjekte politike.
“Është e domosdoshme që të kemi sa më shumë konsultime edhe si subjekte politike. Përveç kësaj, duhet ta bëjmë ndarjen e qartë të gjërave që nuk janë të njëjta”, duke shtuar se byroja dhe vettingu nuk janë e njëjta gjë.
Ministrja e Drejtësisë, Albulena Haxhiu, ka thënë se ky projektligj pas votimit në parim, në lexim të dytë do të adresohen rekomandimet e Komisionit të Venecias.
Kryetari i LDK-së, Lumir Abdixhiku, ka thënë se partia e tij nuk e mbështet Qeverinë, nëse nuk ka gjithpërfshirje.
“Ju keni kërkuar gjithëpërfshirjen edhe ne po kërkojmë gjithpërfshirje… Ju kryetar i Kuvendit keni marrë përsipër dërgimin e këtij ligji në Komisionin e Venecias dhe këtë ndërmarrjen tuaj e kemi vlerësuar këtu në Kuved”, ka thënë ai, duke shtuar se “jam vullnetar në verifikim e pasurisë, vërejtjet janë për të mbrojtur rendin kushtetues dhe për të bërë reformën njëmend”.
Shefi i GP të PDK-së, Abelard Tahiri ka thënë se për reformën në drejtësi është i rëndësishëm konsensusi politik.
“Konsensusin në reformën në drejtësi e shoh jashtëzakonisht të rëndësishëm… mendoj që këtu edhe Qeveria duhet të reflektojë”, ka thënë ai.
Ndërkaq shefi i GP të AAK-së, Besnik Tahiri, ka thënë se janë darkorduar që pronësinë mbi vettingun ta marrë Kuvendi i Kosovës.
“Nuk mund ta bëjë as vettingun e as këto ligje një parti”, tha ai, duke shtuar se nëse pozita hyn në këtë proces pa koordinim, atëherë ata nuk do t’i mbështesin.
Kryetari i Kuvendit, Galuk Konjufca, i cili e ka dërguar këtë projektligj në Komisionin e Venecias tha se i ka pritur opinionet e këtij komisioni dhe se i ka lexuar ato me vëmendje.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
