.png)
Nga Gazeta Si - Pas 30 vitesh po zhvillohen ekspedita arkeologjike në zonën e Belshit. Ekspedita po zhvillohet në bashkëpunim mes specialistëve të Institutit të Kombëtar të Trashëgimisë Kulturore me Fakultetin e Histori-Filologjisë.
Ministrja e Kulturës Elva Margariti thotë se objekti i zbuluar mund të jetë pjesë e një kompleksi rural.
“Është gjithmonë një ndjesi e veçantë kur nëntoka na zbulon copëza historie. Pas më shumë se 30 vitesh, specialistët e Institutit Kombëtar të Trashëgimisë Kulturore, në bashkëpunim me Fakultetin e Histori-Filologjisë dhe me mbështetjen e Bashkisë Belsh, po zhvillojnë një ekspeditë gërmimesh arkeologjike për zbulimin e strukturave të një terme të periudhës romake. Sipas hulumtimeve paraprake, objekti i zbuluar mendohet të jetë pjesë e një kompleksi rural i tipit ‘Villa Rustica’, e datuar mes shek. III-IV pas Krishtit”, shprehet ministrja e Kulturës për gërmimet në Belsh, ku ka ndarë dhe imazhe gjatë punës së kësaj ekspedite arkeologjike në vendin tonë.
Ministrja e Kulturës gjithashtu bën me dije se specialistët e IKTK po punojnë edhe për restaurimin e monumentit.
“Ky monument përbën një aset kulturor të çmuar për zonën e Belshit dhe për trashëgiminë kulturore të vendit tonë. Njëkohësisht me gërmimin arkeologjik, restauratorët e institutit po punojnë për projektin e konservimit dhe restaurimit të monumentit, me qëllim kthimin e tij të vizitueshëm”, vijon më tej Margariti.
Ky zbulim i veçantë do të jetë një vlerë e shtuar për zonën e Belshit, duke na dhënë njohuri më të thelluara të shtresave të historisë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
