Gazeta Si – Klodian Duro është trajneri i ri i Lushnjës. Ish-lojtari i Kombëtares rikthehet në stol pas eksperiencave që ka pasur më parë te Kamza, Kukësi, Luftëtari dhe Feronikeli në Kosovë.
Lajmin e ka dhënë vetë trajneri 44-vjeçar me një postim në faqen e tij në Facebook. Elbasanasi ka postuar një foto para stadiumit të Lushnjës “Roza Haxhiu”, bashkë me kryebashkiaken Eriselda Sefa, në cilësinë e presidentes të skuadrës, dhe deputetin Taulant Balla.
Klodian Duro ka edhe një mesazh filozofik drejtuar lushnjarëve, të cilët i fton për të ndihmuar në sfidën e tij të re.
“Faleminderit kryetares së bashkisë Eriselda Sefa dhe z.Taulant Balla që më besuan drejtimin e këtij projekti për krijimin e një klubi profesionist. Për të rikthyer Lushnjën atje ku i takon, në Superiore.
Ftoj të gjithë bizneset, tifozët, qytetarët dhe çunat e Lushnjës t’i bashkohen dhe ta mbështesin këtë projekt ambicioz, që fillon nga ekipet zinxhir të fëmijëve të akademisë e deri tek ekipi A.
Roma nuk u ndërtua për një ditë, por me shumë punë dita-ditës. Dhe ne të bashkuar dhe me shumë punë do t’ia dalim ta rikthejmë Lushnjën në Superiore për të mirën e të gjithë fëmijëve, qytetarëve dhe tifozëve lushnjarë”, – shkruan Duro.
Lushnja ka disa vite që vuan në futbollin inferior, pa mundur t’i bashkohet elitës. Sezonin e fundit kjo skuadër është drejtuar nga trajneri Agim Canaj.
Një tjetër ish-lojtar i Kombëtares, Nevil Dede, pritet të marrë drejtimin e Dinamos, që sezonin e ri do të luajë në Kategorinë e Parë. Dede drejtoi Erzenin sezonin e fundit, duke e ngjitur atë në elitë.
Ish-lojtari i Tiranës ka arritur akordin me drejtuesit e Dinamos dhe zyrtarizimi pritet të bëhet këto ditë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
