Gazeta Si – Trupi i pajetë i gjetur një ditë më parë në fshatin Kreshovë të Ersekës, dyshohet se është i 27-vjeçarit Sherif Mukaj.
Ai është denoncuar i zhdukur nga familjarët e tij në datë 1 nëntor 2021, pasi kishin humbur kontaktet me të.
Edhe pse policia nuk ka një përgjigje përfundimtare të analizave të ADN-së, dyshimet janë që trupi të jetë i të riut nga Erseka.
Pranë trupit të dekompozuar rrëzë malit të Gramozit, u gjet një çelës që i përket shtëpisë së viktimës dhe një celular “Nokia” i vjetër.
Edhe familjarët e viktimës kanë konfirmuar që çelësi i gjetur ka hapur derën e shtëpisë.
Trupi i dekompozuar i 27-vjeçarit u gjet të shtunën nga dy barinj të zonës. Hetimet janë fokusuar në disa pista dhe po kryhen nga sektori i vrasjes në Drejtorinë e Policisë së Korçës.
Për të kuptuar shkakun e vdekjes së Sherif Mukajt, do të priten rezultatet e ekspertizës mjeko-ligjore.
Familjarët në atë kohë bën denoncimin në polici, por edhe në media për gjetjen e djalit të tyre, pasi nuk kishin arritur të komunikonin me të prej datës 1 nëntor.
Familja e Sherifit prej disa kohësh jetonte në SHBA, ndërsa ai ishte i vetëm në Shqipëri në fshatin Starje të Kolonjës.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
