Gazeta Si – Pas fitores së Egnatias në ndeshjes shtesë me Korabin konfigurohet edhe Superiorja e sezonit 2022-23. Do të jetë një kampionat i varfër nga emrat. Elitës së futbollit shqiptar do t’i mungojnë shumë tituj kampionë.
Dhjetë skuadrat e sezonit të ri janë Tirana, Partizani, Vllaznia, Teuta, Kukësi, Laçi, Kastrioti, Egnatia, Bylisi dhe Erzeni. Dy të fundit janë ngjitur nga Kategoria e Parë. Ballshiotët kanë qenë vazhdimisht në elitë, kurse shijakasit kthehen pas një kohe të gjatë.
Fakt është se Superiorja e sezonit të ri do të jetë ndoshta më e varfra sa u takon titujve kampion. Do t’i mungojnë 18 titujt e Dinamos, 8 të Skënderbeut, 2 të Elbasanit dhe 1 i Flamurtarit.
Do të mungojnë gjithashtu emra të tjerë të njohur shkollash të futbollit në vend, si Besa, Apolonia, Lushnja, Tomori, Besëlidhja, Luftëtari e të tjerë. Të gjitha këto klube do të jenë pjesë e futbollit inferior sezonin e ri.
Kjo çështje ka qenë shpesh në qendër të debatit. Vërtet sot futbolli sot varet shumë nga ekonomia e tregut, por njëkohësisht duhet të ketë politika që të ndihmojnë skuadrat më me emër. Janë ato që prodhojnë talente dhe e ndihmojnë futbollin tonë të ecë përpara.
Sezonin e ri, ndoshta më shumë interes se Superiorja do të ketë Kategoria e Parë. Një pjesë e mirë e skuadrave me emër luajnë aty dhe mund të ketë më shumë rivalitet sportiv se në Superiore.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
