Gazeta Si – Nerva dhe shkelma në Premier Ligë. Evertoni siguron qëndrimin në javën e parafundit të kampionatit dhe tifozët pushtojnë fushën. Trajneri Patrik Vieira konfrontohet fizikisht me një tifoz kundërshtar.
Akte çmendurie në “Goodison Park” nga tifozët e ekipit vendas dhe nga trajneri frabncez. Goli i fitores 3-2 të Evertonit ndaj Kristal Palasit shkaktoi një festë, që doli jashtë kontrollit në këtë stadium.
Kalvert-Leuin shënoi golin e fitores 5 minuta para fundit, duke bërë që Evertoni të kalojë Kristal Palasin në renditje. Ishte një përmbysje e madhe e Evertonit, pasi Kristal Palas kryesonte 0-2. Në fund situata doli jashtë kontrollit.
Shkallët e stadiumit të Evertonit u boshatisën, sepse tifozët pushtuan fushën. Një nga tifozët më të çmendur iu afrua trajnerit të ekipit mik, Patrik Vieira, të cilin e provokoi me gjeste dhe fyerje.
Trajneri francez reagoi fillimisht duke e kapur me duar, më pas e goditi me shkelm, duke e e rrëzuar në tokë. Për pak sa nuk shpërtheu një zankë masive me grupin e tifozëve të Evertonit. Këta të fundit, fatmirësisht, patën kthjelltësinë për të mos e vazhduar sulmin.
Patrick Vieira has been filmed in an altercation with an Everton fan on the pitch at Goodison Park during tonight’s pitch invasion. pic.twitter.com/MOliWvsSHJ
— Sky Sports News (@SkySportsNews) May 19, 2022
Pamjet e kësaj ngjarjeje, të filmuara me telefonë, kanë bërë xhiron e rrjeteve sociale. Tashmë gjithçka ka kaluar në dorë të ‘Football Association’, që me siguri do të marrë masa ndaj klubit të Evertonit dhe trajnerit francez. Pritet dënim shembullor për të dhe klubin vendas.
“Nuk kam asgjë për të thënë për këtë çështje”, – u shpreh trajneri Vieira, duke iu përgjigjur një pyetjeje në konferencën e shtypit pas ndeshjes. Nervozizmi bën të vetën në të tilla raste, por Vieria nuk mund t’i shpëtojë dënimit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
