Gazeta Si – Spektakli ishte i garantuar. Golat po ashtu. Plot 7 u shënuan në “Etihad”, 4 nga të cilët nga të zotët e shtëpisë. Mançester Siti ka fituar aktin e parë gjysmëfinal në Champions ndaj Real Madrid, me rezultatin 4-3.
Pep Guardiola dhe të tijtë janë të favorizuar nga kjo fitore, por Reali mbetet Real, sidomos në Champions. “Qytetarët” u gjendën tri herë në avantazh të dyfishtë dhe në të tre rastet të besuarit e Ançelotit arritën të shkurtonin dhe të mbeteshin në lojë.
Goli i parë erdhi pa u mbushur ende dy minuta nga De Bryjne, i cili goditi saktë me kokë pas një krosi të Mahrez nga e djathta. Gabriel Jesus dyfishoi rezultatin, por i përhershimi Benzema futi Realin në lojë, duke shkurtuar shifrat në 2-1.
Me fillimin e pjesës së dytë, Foden realizoi edhe të tretin për Mançester Sitin. Edhe ai shënoi me kokë në qendër të zonës, ku Reali pari më shumë probleme në këtë ndeshje. Reagimi i spanjollëve erdhi menjëherë me Vinicius, brazilianin që shënoi golin e dytë pas një shkëputjeje të bukur.
Pastaj ishte radha e Bernardo Silvës të mposhtte portierin Kurtua me një gjuajtje të fortë dhe 4-2. Karim Benzema do të shënonte me penallti edhe golin e tretë për Realin dhe të dytin personal. Një gol që mban gjallë shpresat e madrilenëve për kualifikimin për në finale.
Ançeloti nuk preferoi të rrezikonte me Kasemiron, i cili vinte nga dëmtimi dhe qëndroi gjithë kohën në stol. As Alaba nuk ishte në gjendje optimale dhe u ndërrua pas pjesës së parë. Guardiola humbi mbrojtësin Stons gjatë pjesës së parë për dëmtim. Gjithçka mbetet e hapur për në ndeshjen e kthimit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
