Gazeta Si – Vedat Muriqi la shenjën e tij edhe në ndeshjen e fundit të Majorkës. Ai shënoi në fitoren ndaj Alaveshit, por golat e tij tashmë nuk janë më lajm. Sulmuesi kosovar realizoi golin e dytë për Majorkën dhe ky ishte goli i 4-t për të në aventurën spanjolle.
Në 12 ndeshje me skuadrën ishullore, Muriqi ka dhënë edhe një asist, duke u bërë një titullar i rëndësishëm. Një paraqitje krejt tjetër nga ajo me Lacion, ku lojtari kosovar nuk mundi të tregonte vlerat e tij. Për një vit e gjysmë, në 49 ndeshje me fanellën e Lacios në të gjitha kompeticionet, Muriqi ka shënuar vetëm 2 gola.
Interesant është fakti se të dy golat ia ka shënuar Atalantës, një në Kupën e Italisë dhe një në kampionat. Shumë pak për një lojtar që verën e 2020-ës u ble nga Fenerbahçe për rreth 20 milionë euro. Në janar Muriqi u transferua te Majorka, në huazim me të drejtën e blerjes për 12-13 milionë euro. Klubi spanjoll duket se nuk kanë në plan ta blejnë kartonin e kosovarit dhe Muriqi është i detyruar të kthehet në Romë në verë.
Mund të jetë një rikthim i përkohshëm, para se të sistemohet diku tjetër, me shumë mundësi në Turqi. Fenerbahçe mund ta rikthejë në bazë “Piratin”, por atë e pëlqen edhe Gallatasaraji. Lacion nuk e bind për të qenë një pasues i Imobiles.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
