Gazeta Si – Mbrojtësi i Kombëtares, Marash Kumbulla, po kalon një sezon të vështirë te Roma në aspektin personal. Kur u duk se ‘krisja’ me trajnerin Mourinjo ishte lënë pas krahëve dhe lojtari kuqezi kishte fituar besimin e tij, sërish Kumbulla nuk po e sheh fushën e blertë.
Edhe ndaj Napolit, ku Roma barazoi 1-1, Kumbulla qëndroi 90 minuta në stol, ashtu si ndaj Bodo Glimt në Ligën e Konferencës javën e kaluar. Roma po luan ndeshje të shpeshta në kampionat dhe Kupat e Europës, por sërish për mbrojtësin kuqezi nuk ka pasur vend. Që pas ndeshjes me Salernitanën, kur u ndërrua në pushim, Kumbulla nuk ka zbritur më në fushë.
Me Mourinjon në stol, pavarësisht vlerësimeve të këtij të fundit, lojtari i Kombëtares do ta ketë gjithmonë të vështirë dhe ndoshta është momenti të mendojë për një aventurë të re, për një skuadër, ku mund të aktivizohet rregullisht dhe të rritë nivelin e tij profesional.
Është rikthyer ndërkohë nga dëmtimi mbrojtësi tjetër kuqezi, Berat Gjimshiti. Ai luajti në pjesën e dytë të ndeshjes ndaj Veronës, ku Atalanta humbi 1-2. Gjimshiti u hodh në fushë nga trajneri Gasperini, kur rezultati ishte 0-2.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
