Zyrtarët e shëndetit publik në Evropë dhe Shtetet e Bashkuara po hetojnë dhjetëra raste të çuditshme të hepatitit të rëndë te fëmijët e vegjël.
Hepatiti është një inflamacion i mëlçisë. Shkaku është shpesh një virus, por viruset që zakonisht shkaktojnë sëmundjen – hepatiti A, B, C, D dhe E – janë përjashtuar në rastet në fjalë, duke lënë mjekët me shumë pikëpyetje.
Në disa raste, sëmundja ishte aq e rëndë sa fëmijët kishin nevojë për transplantim të mëlçisë. Nuk është raportuar asnjë vdekje.
Organizata Botërore e Shëndetësisë tha të dielën në një deklaratë për mediet,se po hetonte 74 raste të hepatitit të rëndë akut te fëmijët nën moshën 13 vjeç në Mbretërinë e Bashkuar dhe Irlandën e Veriut. Tre raste u raportuan gjithashtu në Spanjë, tha OBSH. Nuk është e qartë se kur filluan simptomat për shumicën e fëmijëve, por nëntë u sëmurën në mars dhe një në janar të 2022, sipas OBSH.
Në SHBA, nëntë raste janë raportuar te fëmijët e moshës 6 vjeç e lart në Alabama.
Wes Stubblefield, oficer mjekësor i qarkut për Departamentin e Shëndetit Publik në Alabama, tha se të gjithë fëmijët ishin të shëndetshëm përpara se të sëmureshin dhe se nuk kishte asnjë lidhje të dukshme midis fëmijëve.
Me përjashtimin e viruseve të zakonshme të hepatitit, teoria aktuale kryesore është se mund të jetë një virus tjetër, i quajtur adenovirus i tipit 41,por të dhënat nuk janë të sakta.
Pesë nga nëntë fëmijët në Alabama, të identifikuar midis tetorit 2021 dhe shkurtit, rezultuan pozitivë për adenovirusin e tipit 41. Por adenoviruset janë viruse të frymëmarrjes që zakonisht shkaktojnë ftohjen e zakonshme dhe në përgjithësi nuk lidhen me dëmtimin e mëlçisë.
Burimi:CNN/Përshtati:Gazeta “Si”
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
