Gazeta Si – Janë luajtur sot dy ndeshjet çerekfinale të Ligës së Kampionëve, ku Mançester Siti ka mundur 1-0 Atletiko Madridin dhe Liverpuli ka triumfuar 1-3 në Portugali ndaj Benfikës.
Të besuarit e Pep Guardiolës hasën jo pak vështirësi për të shkuar te fitorja, edhe pse patën epërsi ndaj spanjollëve. Fitorja, edhe pse minimale, u jep ‘qytetarëve’ mundësinë për ta administruar më mirë ndeshjen e kthimit, ndërsa shanset e kualifikimit janë të mëdha për ta.
Trajneri Diego Simeone, ashtu siç parashikohej, luajti me një mbrojtje të ngjeshur, me 5 lojtarë, duke lënë pak hapësira për kundërshtarin. Fortesa e Atletikos do të shembej pas 70 minutash lojë, kur beglu Kevin De Bryjne dërgoi në rrjetë një top të marrë nga Foden në zonë.
Në ndeshjen tjetër çerekfinale, Liverpuli fitoi 1-2 në fushën e Benfikës, duke hedhur kështu një hap drejt kualifikimit në gjysmëfinale. Konate zhbllokoi shifrat me kokë në një goditje këndi, më pas Mane dyfishoi, pas asistit të Luis Diaz.
Portugezët u rifutën në lojë sapo nisi pjesa e dytë, kur Nunjez shfrytëzoi një gafë të Konate në mbrojtje. Shpresat e Benfikës për rezultat pozitiv u shuan 2 minuta para fundit, kur Diaz shënoi edhe golin e tretë.
Liga e Kampionëve, çerekfinalet
Sot
Benfika-Liverpul 1-3
Mançester Siti-Atletiko Madrid 1-0
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
