Gazeta Si – Laçi ka mbyllur sot bashkëpunimin me trajnerin Mirel Josa. Rezultatet e javëve të fundit janë bërë shkak për largimin e trajnerit kryeqytetas, me 6 ndeshje pa fitore, por ajo që duket sikur nuk shkon ka të bëjë me faktin se kurbinasit janë brenda objektivave sezonalë.
Vendimi nga presidenti i Laçit, Pashk Laska, është marrë një ditë pas humbjes me Partizanin në kampionat. Pas 27 javësh, Laçi mban vendin e dytë, me 46 pikë, ndërkohë që është gati i kualifikuar për në finale të Kupës së Shqipërisë, pas fitores 1-2 në gjysmëfinalen e parë ndaj Teutës. Europa duket e sigurt për këtë skuadër, por edhe kjo nuk mjafton, me sa duket.
Vendin e Josës e ka marrë trajneri tjetër kryeqytetas, Shpëtim Duro, i cili i ka drejtuar kurbinasit edhe sezonin e kaluar, kështu që kemi të bëjmë me një rikthim. Në fazën e parë u shkarkua trajneri malazez Dejan Vukiçeviç, pas atij starti të keq, ndërsa tani ishte radha e Mirel Josës, edhe pse ky i fundit në total ka pasur një ecuri shumë të mirë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
