Gazeta Si – Torino nuk fiton prej 8 ndeshjesh në kampionat dhe synon kthesën nga Salerno. Në portën e kësaj skuadre do të jetë sërish Etrit Berisha, portieri i Kombëtares shqiptare, që bëri një paraqitje të mirë edhe në miqësoren me Spanjën.
Trajneri Ivan Juriç e ka thënë hapur së fundi se i beson “gardianit” kuqezi, sepse është në një formë shumë të mirë sportive. “Berisha ka zhvilluar dy ndeshje shumë të mira dhe pastaj është ai ‘gabim, ose jo gabim’ ndaj Xhenoas. Ai ka bërë shumë mirë ndaj Interit dhe Bolonjës, kështu që mendimi im është që të vazhdoj me të në portë”, – është shprehur trajneri i Torinos.
Berisha ka fituar kështu balotazhin me serbin Milinkoviç-Saviç. Portieri shqiptar e nisi këtë sezon në stol dhe pak ka luajtur. Ai shfrytëzoi momentin e dëmtimit të shokut të repartit, duke treguar vlerat më të mira, ndaj dhe trajneri kroat i ka dhënë besim. Ndoshta Juriç i ka për zemër shqiptarët, nëse sjellim në vëmendje edhe faktin se ishte ai që i besoi verbërisht Marash Kumbullës te Verona.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
