A mund të jetë bima e duhanit e ardhmja e mishit të kultivuar?

Startup izraelit BioBetter po ripërdor bimët e duhanit për të prodhuar përbërës që nxisin rritjen e qelizave në një hap që mund të heqë një nga pengesat më të mëdha për prodhimin e mishit laboratorik në shkallë të gjerë.

Mishi i kultivuar, i cili është rritur nga qelizat e muskujve të kafshëve në një laborator, ka marrë shumë vëmendje si një mënyrë për të adresuar ndryshimet klimatike duke reduktuar përdorimin e energjisë, tokës dhe ujit në industrinë e mishit.

Për të zgjidhur problemin me faktorët e rritjes së qelizave të mishit, të cilat janë të vështira për t’u prodhuar, BioBetter po fut sekuencat përkatëse të gjeneve në qelizat e duhanit për t’i “mësuar” ato të prodhojnë faktorët e rritjes së qelizave, një teknologji e quajtur ADN rekombinante që përdoret gjithashtu në fusha të tjera si prodhimi i insulinës mjekësore.

BioBetter zgjodhi duhanin pasi ai mund të arrijë deri në katër cikle rritjeje në vit, mund të korret gjatë gjithë vitit dhe nuk mund të përdoret si ushqim për shkak të shijes së tij të hidhur, tha shefi ekzekutiv Amit Yaari.

“Tendenca globale për reduktimin e pirjes së duhanit po ngre shqetësime midis kultivuesve të duhanit se kultura mund të vjetërohet. Megjithatë, bima e duhanit ka potencial të madh për t’u bërë një komponent kyç në të ardhmen e ushqimit”, tha Yaari në një deklaratë.

Aktualisht, faktorët e rritjes, insulina dhe transferina (një lloj proteine) mblidhen nga bagëtia, duke e bërë të vështirë marrjen e sasive të mëdha. Ato gjithashtu mund të prodhohen nga fermentimi i baktereve, por këto metoda kërkojnë pajisje të shtrenjta dhe një proces të komplikuar pastrimi.

“Instituti i Ushqimit përcaktoi se një reduktim afërsisht 100-fish i kostove të insulinës dhe transferinës kërkohet për ta bërë mishin e kultivuar ekonomikisht të qëndrueshëm”, tha Dana Yarden, bashkëthemeluesja e BioBetter.

Instituti i Ushqimit promovon alternativa me bazë bimore dhe qelizore ndaj produkteve shtazore.

Përdorimi i bimëve të duhanit në prodhim në shkallë të gjerë në fusha të tjera mund të jetë një hap i rëndësishëm, tha Yarden.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.