Gazeta Si – Armando Broja është gjithmonë e më tepër në qendër të vëmendjes sportive në Angli. Vlerësimet për të nuk mungojnë nga shtypi dhe ish-futbollistët e njohur të Premier Ligës, të cilët flasin për një talent të rrallë, apo edhe një aset të Çelsit.
Ky është termi që ka përdorur në komentin e tij për sulmuesin kuqezi ish-lojtari i Mançester Sitit, Mikah Riçards. Ai ka theksuar se gjatë ndeshjes ndaj Mançester Junajtid, Broja arriti të fitonte duelet jo vetëm me Meguajër, por edhe me Varane. Sipas ish-mbrojtësit anglez, kjo gjë tregon shumë për kualitetin e sulmuesit 20-vjeçar.
Paraqitja e jashtëzakonshme e Brojës ka shtuar interesimin për shërbimet e tij, gjithmonë nëse Çelsi do të vendosë ta shesë në verë. Përveç Arsenalit dhe Njukasëllit, edhe Lids Junajtid i trajnerit Marselo Bielsa po ndjek më vëmendje situatën e Armando Brojës.
Po ashtu, ka zëra se për sulmuesin e Kombëtares së Shqipërisë ka një interesim edhe nga dy klubet e mëdha gjermane, Bajern Mynih dhe Borusia Dortmund. Broja ia ka rritur shumë vlerat vetes me golat që po shënon me fanellën e Southemptonit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
