Ja ku vjen edhe firma, e zeza mbi të bardhë. Teo Hernandez ka rinovuar kontratën me Milanin deri në vitin 2026. I ardhur në verën e 2019-ës, me 19 gola dhe 18 asiste në 108 ndeshje, mbrojtësi francez do të vazhdojë të luajë me klubin kuqezi, ku gjithmonë ka deklaruar se dëshiron të qëndrojë. “Nëse është e mundur, do të qëndroja përjetë te Milani”, – ka thënë ai.
Teo Hernnadez ka rinovuar për 4 milionë euro në vit, plus bonuset. Një rritje e konsiderueshme, po të kemi parasysh se deri tani merrte 1.5 milionë. Maldini e bindi të zgjidhte Milanin me një ‘blitz’ në Ibiza dhe tani historia vazhdon. Bëhet fjalë për rinovimin e 6-të të sezonit, pas Kalabrias, Saelemaekers, Kjaer, Piolit dhe Gabias.
“Jam shumë i lumtur. Nga dita e parë jam ndjerë shumë mirë këtu, me të gjithë, që nga Maldini, skuadra dhe stafi. Për këtë arsye kam rinovuar. Duhet të vazhdojmë kështu, t’i bëjmë gjërat mirë. Është e vërtetë, e pranoj, ishin disa skuadra që më donin, por gjithmonë kam menduar Milanin. Jam vërtet i lumtur: skuadra, shokët, e fejuara, fëmija që po presim.
Jam i ri dhe duhet të rritem. A jam më i mirë se të tjerët? Nuk më takon mua ta them, por Pioli më ka përmirësuar në çdo gjë, si lojtar dhe si njeri. Ditën e parë më ka thënë që të bëj atë që di. Më ndihmon shumë” – ka thënë Hernnadez. Një koment në fund edhe për fëmijën që pret: “Momenti më i bukur është kur kthehem në shtëpi dhe shoh barkun e Zoe. Shumë bukur, vërtet”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
