Pas gati 20 vitesh të mbushur me trofe, “Topa të Artë” dhe tituj kampionë e çmime të tjera, Kristiano Ronaldo dhe Lionel Mesi mund të luajnë bashkë sezonin e ardhshëm.
Sipas asaj që bën me dije “Daily Mirror”, Zinedin Zidan, ëndrra e sheikëve të PSG-së, ka vënë këtë kusht për t’u ulur në stolin e ekipit francez. Ai kërkon blerjen e Kristiano Ronaldos, i cili do të largohej nga Mançester Junajtid pa shumë pengje.
Pavarësisht faktit se titulli kampion në Ligue 1 është në “xhep” dhe skuadra është plotësisht në garë për të fituar Ligën e Kampionëve, aventura e Mauricio Poketinos në Paris i ka muajt të numëruar. Objektivi kryesor i drejtuesve të PSG-s është Zinedin Zidan, i interesuar edhe për stolin e Francës.
Zizu, sipas të përditshmes britanike, ka vendosur si kusht afrimin e Kristiano Ronaldos, me të cilin në Madrid ka fituar gjithçka. Do të ishte një blerje, që do ta bënte më pak të hidhur lamtumirën e Kilian Mbapesë, tashmë i prenotuar nga Real Madridi, si dhe do krijonte dyshen perfekte me Mesin.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
