Java e 19-të e Abissnet Superiores ka luajtur sot tri ndeshjet e para të saj. Tirana kryesuese ka bërë detyrën në “Air Albania”, duke mundur Skënderbeun 3-2 dhe duke thelluar diferencën me ndjekësit në 12 pikë, por Laçi dhe Kukësi kanë një ndeshje më pak.
Seferi, Limaj dhe Devid realizuan 3 golat për skuadrën e Orges Shehit, që ndoshta u vetëkënaq dhe lëshoi disi më pas në lojë. Korçarët shkurtuan me Zguron dhe në shtesë realizuan edhe golin e dytë, por janë gola që vlejnë për statistika, sepse nuk kanë mjaftuar për të marrë pikë në kryeqytet.
Partizani i ka dhënë një leksion të mirë Teutës kampione në “Elbasan Arena”, duke shënuar plot 4 herë në portën e saj. Ndeshja nisi në mënyrën më të mirë për të kuqtë, me golin e Skukës. Më pas dyfishoi Cara, ndërsa në pjesën e dytë shënuan edhe Sota e Zhunior. Një ndeshje shumë e dobët për Teutën, që luajti me 10 vetë për mbi gjysmë ore, pasi Daja u ndëshkua me karton të kuq.
Dinamo mbetet në krizë të thellë. Sot është mundur 2-0 edhe nga Kastrioti i vendit të fundit dhe trajneri Bledi Shkëmbi rrezikon shumë largimin nga blutë. Java e 19-të vazhdon të dielën me ndeshjet Egnatia-Kukësi dhe Laçi-Vllaznia.
Abissnet Superiore, java e 19-të
Sot
Tirana-Skënderbeu 3-2
Teuta-Partizani 0-4
Kastrioti-Dinamo 2-0
Të dielën
Egnatia-Kukësi
Laçi-Vllaznia
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
