Një tallje e hapur nga Komisioni i Disiplinës dhe Etikës pranë FSHF-së, që sapo ka publikuar vendimet në lidhje me ngjarjet e ndeshjeve të fundit. Vëmendja ishte e gjitha te ngjarja e Rrogozhinës, ku në pushim të ndeshjes Egnatia-Dinamo u godit arbitri ndërkombëtar Enea Jorgji.
Një ngjarje e rëndë, që Disiplina në mënyrë komike e ka interpretuar si sjellje ta gabuar të tifozëve dhe e ka gjobitur Egnatian me 100 mijë lekë. Ky komision ka bërë “kurban” një drejtues të klubit rrogozhinas, duke e pezulluar me 8 ndeshje, por kjo nuk ka aspak rëndësi.
Janë çuditë e zakonshme të futbollit shqiptar, ku një goditje e arbitrit dhe pjesa e dytë fillon me 15 minuta vonesë përkthehen vetëm në sjellje të gabuar të tifozëve. Minimalisht për atë ndeshje Egnatia duhej të dënohej me disa ndeshje pa tifozë. Ose anëtarët e Komisionit të Disiplinës janë verbuar, ose nuk duan të prishin qejfin e klubeve në prag të zgjedhjeve të 2 marsit.
Vendimet kryesore të Komisionit të Disiplinës dhe Etikës
Partizani, për mosrespektim të përsëritur të Rregullores së Veprimtarisë Futbollistike, duke mos vendosur stemën e Abissnet Superiore, në mëngën e djathtë të fanellës së lojës, dënohet me gjobë 100.000 lekë.
Teuta, për mosrespektim të përsëritur të Rregullores së Veprimtarisë Futbollistike, duke mos vendosur stemën e Abissnet Superiore, në mëngën e djathtë të fanellës së lojës, dënohet me gjobë 100.000 lekë.
Egnatia, për sjellje të gabuar të spektatorëve, hedhjen e sendeve në terrenin sportiv, dënohet me gjobë 100.000 lekë.
Zyrtari i Egnatias, Klevis Murati, për sjellje josportive ndaj zyrtarëve të ndeshjes, dënohet me 8 ndeshje pezullim.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
