Tifozët e Lacios kanë bërë sot atë që kishin paralajmëruar, ata kanë shkuar në qendrën stërvitore të skuadrës dhe kanë kontestuar presidentin Klaudio Lotito dhe drejtorin sportiv Igli Tare.
Ultrasit e Lacios kanë vendosur banderola dhe kanë lëshuar në kor fyerje ndaj Lotitos dhe Tares. I gjithë ky zemërim vjen për pasivitetin e Lacios në merkaton e janarit, që u mbyll vetëm me afrimin e Kabral nga Sportingu i Lisbonës. “Një tjetër merkato mediokre, Lotito nuk je i denjë për këtë klub”, – ushte sllogani në kangjellat e Formelos.
Protesta e tifozëve lacialë nuk pati incidente. Merkatoja e fundit ishte vetëm pika që derdhi ujin vazon e trazuar. “18 vjet turp, – ishte ajo që dëgjohej nga goja e rreth 300 tifozëve lacialë. – Nuk dihet ku shkojnë paratë, ato që duhen për një program sportiv nuk gjenden kurrë. Lacio i duhet vetëm për punët e tij të ndyra”.
Në shënjestër të sulmeve të tifozëve ishte edhe Igli Tare, ndërsa një kor ka thirrur emrin e ish-presidentit Serxhio Kragnjoti: “Një president, ka vetëm një president”. Kontestimeve u kanë shpëtuar trajneri Mauricio Sarri dhe lojtarët.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
